عمر بھر کی بات بگڑی اک ذرا سی بات میں

ایک لمحہ زندگی بھر کی کمائی کھا گیا

یہ عنایتیں غضب کی یہ بلا کی مہربانی

مری خیریت بھی پوچھی کسی اور کی زبانی

بد گمانی کو بڑھا کر تم نے یہ کیا کر دیا

خود بھی تنہا ہو گئے مجھ کو بھی تنہا کر دیا

ایک دیوانے کو جو آئے ہیں سمجھانے کئی

پہلے میں دیوانہ تھا اور اب ہیں دیوانے کئی

اندھیرا مانگنے آیا تھا روشنی کی بھیک

ہم اپنا گھر نہ جلاتے تو اور کیا کرتے

یہ کریں اور وہ کریں ایسا کریں ویسا کریں

زندگی دو دن کی ہے دو دن میں ہم کیا کیا کریں

مری بے زبان آنکھوں سے گرے ہیں چند قطرے

وہ سمجھ سکیں تو آنسو نہ سمجھ سکیں تو پانی

جی میں آتا ہے کہ دیں پردے سے پردے کا جواب

ہم سے وہ پردہ کریں دنیا سے ہم پردا کریں

دل کی اجڑی ہوئی حالت پہ نہ جائے کوئی

شہر آباد ہوئے ہیں اسی ویرانے سے

وہ آئنہ ہوں جو کبھی کمرے میں سجا تھا

اب گر کے جو ٹوٹا ہوں تو رستے میں پڑا ہوں

دوسروں سے کب تلک ہم پیاس کا شکوہ کریں

لاؤ تیشہ ایک دریا دوسرا پیدا کریں

راستہ روکے ہوئے کب سے کھڑی ہے دنیا

نہ ادھر ہوتی ہے ظالم نہ ادھر ہوتی ہے

آس ہی سے دل میں پیدا زندگی ہونے لگی

شمع جلنے بھی نہ پائی روشنی ہونے لگی

ایک جھونکا اس طرح زنجیر در کھڑکا گیا

میں یہ سمجھا بھولنے والے کو میں یاد آ گیا