اگرچہ روز مرا صبر آزماتا ہے

مگر یہ دریا مجھے تیرنا سکھاتا ہے

ہر سانس نئی سانس ہے ہر دن ہے مرا دن

تقدیر لیے آتی ہے ہر روز نیا دن

میں جانتا ہوں محبت میں کیا نہیں کرنا

یہ وہ جگہ ہے جہاں قیس بھی پھسلتا ہے

کئی طرح کے تحائف پسند ہیں اس کو

مگر جو کام یہاں پھول سے نکلتا ہے

آؤ آنکھیں ملا کے دیکھتے ہیں

کون کتنا اداس رہتا ہے

گلے لگا کے مجھے پوچھ مسئلہ کیا ہے

میں ڈر رہا ہوں تجھے حال دل سنانے سے

تجھ سے کہنا تھا حال دل لیکن

تو بھی اے دوست آئنا نکلا

آدھے گھر میں میں ہوتا ہوں آدھے گھر میں تنہائی

کون سی چیز کہاں رکھ دی ہے کون مجھے بتلائے گا

اس دور نا مراد سے یہ تجربہ ہوا

دیوار گفتگو کے لئے بہترین ہے

خدا کا شکر کہ آہٹ سے خواب ٹوٹ گیا

میں اپنے عشق میں ناکام ہونے والا تھا

وصل نقصان کر گیا میرا

مر گئی آج شاعری میری

ہزار رستے ترے ہجر کے علاج کے ہیں

ہم اہل عشق ذرا مختلف مزاج کے ہیں

زندگی دیکھ تری خاص رعایت ہوگی

اک محبت ہے مرے پاس اگر کرنے دے

اسے پتا ہے کہاں ہاتھ تھامنا ہے مرا

اسے پتا ہے کہاں پیڑ سوکھ جاتا ہے

ایسی پیاری شام میں جی بہلانے کو

پاؤں نکالے جا سکتے ہیں چادر سے

قیمتی شے تھی ترا ہجر اٹھائے رکھا

ورنہ سیلاب میں سامان کہاں دیکھتے ہیں

نکتہ یہی ازل سے پڑھایا گیا ہمیں

حوا برائے حسن ہے آدم برائے عشق

دل اک ایسا کاسہ ہے جس کی گہرائی مت پوچھو

جتنے سکے ڈالوگے اتنا خالی رہ جائے گا

میں اس کی نظروں کا کچھ اس لئے بھی ہوں قائل

وہ جس کو چاہے اسے دیکھنا سکھاتا ہے

دل قناعت ذرا سی کرتا تو

ہر محبت تھی آخری میری

محبتوں کے لئے عمر کم ہے سو وہ شخص

سبھی شکایتیں کچھ دن ادھر ادھر کر دے

مانوس روشنی ہوئی میرے مکان سے

وہ جسم جب نکل گیا ریشم کے تھان سے

اپنا آپ پڑا رہ جاتا ہے بس اک اندازے پر

آدھے ہم اس دھرتی پر ہیں آدھے اس سیارے پر

اینٹ سے اینٹ جوڑ کر، خواب بنا رہا ہوں میں

رخنے نہ ڈال میرے یار، خواب کی دیکھ بھال میں

میں ہاؤ ہو پہ کہانی کو ختم کر دوں گا

یہ عام بات نہیں ہے، اسے خبر لیا جائے

تجھ آنکھ سے جھلکتا تھا احساس زندگی

میں دیکھتا رہا ہوں تجھے خاکدان سے