kahāñ tak saath degī tū hamārā dasht-e-ġhurbat meñ

tujhe is qaid se ai zindagī āzād karte haiñ

kahan tak sath degi tu hamara dasht-e-ghurbat mein

tujhe is qaid se ai zindagi aazad karte hain

daraḳhshāñ chāñd se ruḳh ne mirī vīrān āñkhoñ meñ

bahut se bhar diye jugnū chamak in meñ ubhar aa.ī

daraKHshan chand se ruKH ne meri viran aankhon mein

bahut se bhar diye jugnu chamak in mein ubhar aai

fikr-e-jahāñ nahīñ hai umīd-e-vafā nahīñ

jiine kā koī bhī to bahāna nahīñ rahā

fikr-e-jahan nahin hai umid-e-wafa nahin

jine ka koi bhi to bahana nahin raha

merī nisbat se kare tujh ko na rusvā duniyā

ḳhauf paltā rahā kal tujh se mulāqāt ke baa'd

meri nisbat se kare tujh ko na ruswa duniya

KHauf palta raha kal tujh se mulaqat ke ba'd

vo aksar dekhte haiñ bā-dil-e-nā-ḳhvāsta mujh ko

nasīb-e-dushmanāñ yaaro yahāñ tak baat aa pahuñchī

wo aksar dekhte hain ba-dil-e-na-KHwasta mujh ko

nasib-e-dushmanan yaro yahan tak baat aa pahunchi

dil chaTaḳh jaatā hai merā dekhtā huuñ ḳhud ko jab

barsar-e-paikār shīshe meñ khaḌe ik shaḳhs se

dil chaTaKH jata hai mera dekhta hun KHud ko jab

barsar-e-paikar shishe mein khaDe ek shaKHs se

marhūn-e-iltifāt-e-farāvānī-e-sitam

āshufta-hāl dasht meñ laayā gayā mujhe

marhun-e-iltifat-e-farawani-e-sitam

aashufta-haal dasht mein laya gaya mujhe

tū jab nahīñ thā sāmne tere ḳhayāl se

ai chaudhvīñ ke chāñd bahalnā paḌā mujhe

tu jab nahin tha samne tere KHayal se

ai chaudhwin ke chand bahalna paDa mujhe

sab pe kaifiyyat 'ayāñ hotī nahīñ hai 'ishq kī

mubtalā-e-'ishq par khultā hai ye rāz-e-nihāñ

sab pe kaifiyyat 'ayan hoti nahin hai 'ishq ki

mubtala-e-'ishq par khulta hai ye raaz-e-nihan

phir se duniyā-e-mohabbat ujḌī

phir se ik she'r ġhazal kā hogā

phir se duniya-e-mohabbat ujDi

phir se ek she'r ghazal ka hoga

aañsū mirī āñkhoñ se nikal jaate haiñ aksar

vo daur-e-mohabbat kabhī bhūlā to nahīñ huuñ

aansu meri aankhon se nikal jate hain aksar

wo daur-e-mohabbat kabhi bhula to nahin hun

agar hai jurm to mujrim hai dil jurm-e-mohabbat kā

ḳhumār-e-qaid ko ham ziist kā hāsil samajhte haiñ

agar hai jurm to mujrim hai dil jurm-e-mohabbat ka

KHumar-e-qaid ko hum zist ka hasil samajhte hain

sard mausam jo guzārā thā dil-e-vīrāñ ne

būḌhe bargad ne vo mausam na guzārā hogā

sard mausam jo guzara tha dil-e-viran ne

buDhe bargad ne wo mausam na guzara hoga

ghar ke sannāTe tire halqa-e-āġhosh meñ huuñ

mehrbāñ tū ne mujhe dasht meñ jaane na diyā

ghar ke sannaTe tere halqa-e-aghosh mein hun

mehrban tu ne mujhe dasht mein jaane na diya