پھینک دے خشک پھول یادوں کے

ضد نہ کر تو بھی بے وفا ہو جا

جیسے ویران حویلی میں ہوں خاموش چراغ

اب گزرتی ہیں ترے شہر میں شامیں ایسی

اب زمانے میں محبت ہے تماشے کی طرح

اس تماشے سے بہلتا نہیں تو بھی میں بھی

سبز پیڑوں کو پتہ تک نہیں چلتا شاید

زرد پتے بھرے منظر سے نکل جاتے ہیں

کل جہاں دیوار ہی دیوار تھی

اب وہاں در ہے جبیں ہے عشق ہے

لفظ کی قید سے رہا ہو جا

آ مری آنکھ سے ادا ہو جا

بدن میں روح کی ترسیل کرنے والے لوگ

بدل گئے مجھے تبدیل کرنے والے لوگ

روٹھ کر آنکھ کے اندر سے نکل جاتے ہیں

اشک بچوں کی طرح گھر سے نکل جاتے ہیں

میں ترے ہجر سے نکلوں گا تو مر جاؤں گا

ہائے وہ لوگ جو محور سے نکل جاتے ہیں

زر کا بندہ ہو کہ محرومی کا مارا ہوا شخص

جس کو دیکھو وہی اوقات سے نکلا ہوا ہے

ہماری راہ میں بیٹھے گی کب تک تیری دنیا

کبھی تو اس زلیخا کی جوانی ختم ہوگی

دامن بچا رہے تھے کہ چہرہ بھی جل گیا

کس آگ سے گزر کے تری روشنی میں آئے

ہجر تھا بار امانت کی طرح

سو یہ غم آخری ہچکی سے اٹھا

ان سلگتی ہوئی سانسوں کو نہیں دیکھتے لوگ

اور سمجھتے ہیں کہ جلتا نہیں تو بھی میں بھی

یہیں آنا ہے بھٹکتی ہوئی آوازوں کو

یعنی کچھ بات تو ہے کوہ ندا میں ایسی

بدن میں دل تھا معلق خلا میں نظریں تھیں

مگر کہیں کہیں سینے میں درد زندہ تھا