تھوڑی سی بارش ہوتی ہے

کتنی جلدی بھر جاتا ہوں

جب بچوں کو دیکھتا ہوں تو سوچتا ہوں

مالک ان پھولوں کی عمر دراز کرے

آوازوں میں بہتے بہتے

خاموشی سے مر جاتا ہوں

تجھ کو چھوا تو دیر تک خود کو ہی ڈھونڈتا رہا

اتنی سی دیر میں بھلا تجھ سے کہاں ملا ہوں میں

ہر ایک ساز کو سازندگاں نہیں درکار

بدن کو ضربت مضراب سے علاقہ نہیں

تو کسی صبح سی آنگن میں اتر آتی ہے

میں کسی دھوپ سا دالان میں آ جاتا ہوں

ابر سے اور دھوپ سے رشتہ ہے ایک سا مرا

آئنے اور چراغ کے بیچ کا فاصلہ ہوں میں

کسی سفر کسی اسباب سے علاقہ نہیں

تمہارے بعد کسی خواب سے علاقہ نہیں

قطرہ قطرہ چھت سے ہی رسنے لگی

دھوپ کا رستہ نہ تھا دیوار میں

یوں تو مصحف بھی اٹھائے گئے قسمیں بھی مگر

آخری فیصلہ تلوار اٹھانے سے ہوا

ترے غیاب کو موجود میں بدلتے ہوئے

کبھی میں خود کو ترے نام سے بلاتا ہوا

تری خواہش کسی امکاں کی صورت

ہمیشہ مجھ میں تہہ در تہہ رہی ہے

کواڑ کھلنے سے پہلے ہی دن نکل آیا

بشارتیں ابھی سامان میں پڑی ہوئی تھیں

سمجھ پایا نہیں پر سن رہا ہوں

وہ سرگوشی میں کیا کیا کہہ رہی ہے

میں جاگتے میں کہیں بن رہا ہوں از سر نو

وہ اپنے خواب میں تشکیل کر رہا ہے مجھے

ہم اپنے آپ سے بھی ہم سخن نہ ہوتے تھے

کہ ساری مشکلیں آسان میں پڑی ہوئی تھیں

میرے گریہ سے نہ آزار اٹھانے سے ہوا

فاصلہ طے نئی دیوار اٹھانے سے ہوا