aag le jae kahin ya pani le jae mujhe

aag le jaa.e kahīñ yā paanī le jaa.e mujhe

maiñ bahut mushkil meñ huuñ āsānī le jaa.e mujhe

phuul mujh par khol de ḳhushbū kā dar daurān-e-vasl

ruuh tak us jism kī 'uryānī le jaa.e mujhe

do nuqūsh-e-jāvedāñ ubhreñ kisī tasvīr se

avvalīñ le jaa.e us ko saanī le jaa.e mujhe

dekhtā huuñ har kisī tamsīl ko tafsīl meñ

chāhtā huuñ aañkh kī hairānī le jaa.e mujhe

duur huuñ ābādiyoñ shahzādiyoñ ke shahr se

paas huuñ vīrāne ke vīrānī le jaa.e mujhe

mere baa'd is taḳht kā haqdār merā ghar nahīñ

yaad rakhnā jab mirī sultānī le jaa.e mujhe

ye bhī mumkin hai bachā le mujh ko 'āzar' zindagī

ye bhī mumkin hai ki ye nā-dānī le jaa.e mujhe

aag le jae kahin ya pani le jae mujhe

main bahut mushkil mein hun aasani le jae mujhe

phul mujh par khol de KHushbu ka dar dauran-e-wasl

ruh tak us jism ki 'uryani le jae mujhe

do nuqush-e-jawedan ubhren kisi taswir se

awwalin le jae us ko sani le jae mujhe

dekhta hun har kisi tamsil ko tafsil mein

chahta hun aankh ki hairani le jae mujhe

dur hun aabaadiyon shahzadiyon ke shahr se

pas hun virane ke virani le jae mujhe

mere ba'd is taKHt ka haqdar mera ghar nahin

yaad rakhna jab meri sultani le jae mujhe

ye bhi mumkin hai bacha le mujh ko 'azar' zindagi

ye bhi mumkin hai ki ye na-dani le jae mujhe