aankhon ke darichon se sarab utre hain kitne

āñkhoñ ke darīchoñ se sarāb utre haiñ kitne

ik jaañ hai magar is pe azaab utre haiñ kitne

shāyad tumheñ khoī huī jannat kahīñ mil jaa.e

dekho mirī in āñkhoñ meñ ḳhvāb utre haiñ kitne

jab sā.at-e-ehsāñ thī to ik buuñd na barsī

jab uTh ga.e pyāse to sahāb utre haiñ kitne

duniyā tujhe maiñ dekhūñ to kin āñkhoñ se dekhūñ

ik shaḳhs ke chehre se naqāb utre haiñ kitne

har rauzan-e-zindāñ se lahū jhāñk rahā hai

ghar ghar tirī chāhat ke gulāb utre haiñ kitne

naġhmoñ kā fusūñ chāñd kī zau phuul kī ḳhushbū

us husn-e-dil-ārā pe shabāb utre haiñ kitne

ashkoñ ko safī' hañs ke luTā dil ko lahū kar

tere liye ab kār-e-savāb utre haiñ kitne

aankhon ke darichon se sarab utre hain kitne

ek jaan hai magar is pe azab utre hain kitne

shayad tumhein khoi hui jannat kahin mil jae

dekho meri in aankhon mein KHwab utre hain kitne

jab saat-e-ehsan thi to ek bund na barsi

jab uTh gae pyase to sahab utre hain kitne

duniya tujhe main dekhun to kin aankhon se dekhun

ek shaKHs ke chehre se naqab utre hain kitne

har rauzan-e-zindan se lahu jhank raha hai

ghar ghar teri chahat ke gulab utre hain kitne

naghmon ka fusun chand ki zau phul ki KHushbu

us husn-e-dil-ara pe shabab utre hain kitne

ashkon ko safi' hans ke luTa dil ko lahu kar

tere liye ab kar-e-sawab utre hain kitne