aap ke dar se kidhar jaenge

aap ke dar se kidhar jā.eñge

ḳhaak ho jā.eñge mar jā.eñge

mat nigāhoñ se girānā ham ko

TuuT jā.eñge bikhar jā.eñge

yā pighal jā.eñge garmī se aah

yā to sardī se ThiThur jā.eñge

moTī moTī sī dikhā kar āñkheñ

vo samajhte haiñ ki Dar jā.eñge

ishq ne aur bigāḌā yaaro

varna samjhe the sudhar jā.eñge

mere a.azā kā kyā hogā allāh

un ke gesū to sañvar jā.eñge

daaġh dil ke dikhā to duuñ lekin

dekh kar nāznīñ Dar jā.eñge

haa.e jannat meñ kyā hogā apnā

dil hamāre vahāñ bhar jā.eñge

guzrī jab ham pe qayāmat 'hāvī'

ḳhair ye din bhī guzar jā.eñge

aap ke dar se kidhar jaenge

KHak ho jaenge mar jaenge

mat nigahon se girana hum ko

TuT jaenge bikhar jaenge

ya pighal jaenge garmi se aah

ya to sardi se ThiThur jaenge

moTi moTi si dikha kar aankhen

wo samajhte hain ki Dar jaenge

ishq ne aur bigaDa yaro

warna samjhe the sudhar jaenge

mere aaza ka kya hoga allah

un ke gesu to sanwar jaenge

dagh dil ke dikha to dun lekin

dekh kar naznin Dar jaenge

hae jannat mein kya hoga apna

dil hamare wahan bhar jaenge

guzri jab hum pe qayamat 'hawi'

KHair ye din bhi guzar jaenge