aap ke wade kisi kal se bandhe rahte hain

aap ke va.ade kisī kal se bañdhe rahte haiñ

chāhne vaale usī pal se bañdhe rahte haiñ

tañg aa jaatī haiñ pallū se lagī girheñ bhī

kaise rishte haiñ jo malmal se bañdhe rahte haiñ

sub.h kī shabnamī palkoñ ko masalte hue haath

ik na.e ḳhvāb kī koñpal se bañdhe rahte haiñ

khaTTī mīThī sī koī baat laboñ meñ le kar

muñh ko Dhāñpe hue āñchal se bañdhe rahte haiñ

sirf mere hī bayābāñ pe paḌī os nahīñ

ashk dariyāoñ ke bādal se bañdhe rahte haiñ

shaam kī zulfeñ bikharne se ayaañ hotā hai

kitne jugnū haiñ jo kājal se bañdhe rahte haiñ

zindagī sone kī mohlat nahīñ detī hai 'diyā'

ḳhvāb ta.abīr ke āñchal se bañdhe rahte haiñ

aap ke wade kisi kal se bandhe rahte hain

chahne wale usi pal se bandhe rahte hain

tang aa jati hain pallu se lagi girhen bhi

kaise rishte hain jo malmal se bandhe rahte hain

subh ki shabnami palkon ko masalte hue hath

ek nae KHwab ki konpal se bandhe rahte hain

khaTTi miThi si koi baat labon mein le kar

munh ko Dhanpe hue aanchal se bandhe rahte hain

sirf mere hi bayaban pe paDi os nahin

ashk dariyaon ke baadal se bandhe rahte hain

sham ki zulfen bikharne se ayan hota hai

kitne jugnu hain jo kajal se bandhe rahte hain

zindagi sone ki mohlat nahin deti hai 'diya'

KHwab tabir ke aanchal se bandhe rahte hain