ab guman hai na yaqin kuchh bhi nahin kuchh bhi nahin

ab gumāñ hai na yaqīñ kuchh bhī nahīñ kuchh bhī nahīñ

āsmāñ kuchh bhī nahīñ aur zamīñ kuchh bhī nahīñ

miT gayā dil se aqīdat kā bharam ya.anī ab

us kā dar kuchh bhī nahīñ apnī jabīñ kuchh bhī nahīñ

kyoñ na yak-rañgī-e-hālāt se jī uktā.e

ab koī bazm-e-tarab daur-e-hazīñ kuchh bhī nahīñ

ab to har husn-o-nazar rañg-o-mahak sāz-o-suḳhan

laakh achchhe hoñ magar ḳhud se hasīñ kuchh bhī nahīñ

jaane kis taur hai taqsīm-e-karam allāh kā

hai kahīñ kitnā hī kuchh aur kahīñ kuchh bhī nahīñ

aas bandhtī hai zarā der use takne meñ

kaun kahtā hai sar-e-arsh-e-barīñ kuchh bhī nahīñ

aa hī jā.eñge tah-e-dām-e-ajal sab ik din

ho bhale taḳht-nashīñ ḳhāk-nashīñ kuchh bhī nahīñ

kitnā pur-shor thā anfās kā bahtā dariyā

kyoñ ye kahtā hai dam-e-bāz-pasīñ kuchh bhī nahīñ

miT gayā jism huī ruuh bhī ruḳhsat kab kī

ab yahāñ koī makāñ hai na makīñ kuchh bhī nahīñ

ḳhud se kis taur sahe shaḳhs vo duurī apnī

hai ba-juz apne 'amar' jis ke qarīñ kuchh bhī nahīñ

ab guman hai na yaqin kuchh bhi nahin kuchh bhi nahin

aasman kuchh bhi nahin aur zamin kuchh bhi nahin

miT gaya dil se aqidat ka bharam yani ab

us ka dar kuchh bhi nahin apni jabin kuchh bhi nahin

kyon na yak-rangi-e-haalat se ji uktae

ab koi bazm-e-tarab daur-e-hazin kuchh bhi nahin

ab to har husn-o-nazar rang-o-mahak saz-o-suKHan

lakh achchhe hon magar KHud se hasin kuchh bhi nahin

jaane kis taur hai taqsim-e-karam allah ka

hai kahin kitna hi kuchh aur kahin kuchh bhi nahin

aas bandhti hai zara der use takne mein

kaun kahta hai sar-e-arsh-e-barin kuchh bhi nahin

aa hi jaenge tah-e-dam-e-ajal sab ek din

ho bhale taKHt-nashin KHak-nashin kuchh bhi nahin

kitna pur-shor tha anfas ka bahta dariya

kyon ye kahta hai dam-e-baz-pasin kuchh bhi nahin

miT gaya jism hui ruh bhi ruKHsat kab ki

ab yahan koi makan hai na makin kuchh bhi nahin

KHud se kis taur sahe shaKHs wo duri apni

hai ba-juz apne 'amar' jis ke qarin kuchh bhi nahin