ai arz-e-watan hum tujhe tamir karenge

ai arz-e-vatan ham tujhe ta.amīr kareñge

ham terā muqaddar tirī taqdīr likheñge

Daalī hai kamand ham ne sitāroñ pe hamesha

hamrāh surayyā kī bhī zanjīr kareñge

ḳhurshīd-e-vatan ko inhī hāthoñ se ujālā

ham chāñd sitāroñ ko bhī tasḳhīr kareñge

iqbāl ke shāhīn haiñ shahbāz usī ke

dekhe hue har ḳhvāb kī ta.abīr baneñge

samjhā.eñge ab ham tumheñ maz.hab ke ma.ānī

ham amn-o-aḳhūvvat tirī jāgīr kareñge

parcham ke sitāre meñ bhareñ apnī ziyā.eñ

ham apne junūñ se tujhe tanvīr kareñge

ġhamgīn manāzir na ḳhudā dekhe dikhā.e

ham pyaar mohabbat se ye tasvīr bhareñge

phir fasl-e-gul-o-lāla se mahkegā chaman ye

ham nok-e-sabā se tujhe tahrīr kareñge

ai arz-e-watan hum tujhe tamir karenge

hum tera muqaddar teri taqdir likhenge

Dali hai kamand hum ne sitaron pe hamesha

hamrah surayya ki bhi zanjir karenge

KHurshid-e-watan ko inhi hathon se ujala

hum chand sitaron ko bhi tasKHir karenge

iqbaal ke shahin hain shahbaz usi ke

dekhe hue har KHwab ki tabir banenge

samjhaenge ab hum tumhein mazhab ke maani

hum amn-o-aKHuwwat teri jagir karenge

parcham ke sitare mein bharen apni ziyaen

hum apne junun se tujhe tanwir karenge

ghamgin manazir na KHuda dekhe dikhae

hum pyar mohabbat se ye taswir bharenge

phir fasl-e-gul-o-lala se mahkega chaman ye

hum nok-e-saba se tujhe tahrir karenge