اے خوشا وقتے کہ شوخ طرح دار آ ہی گیا

اے خوشا وقتے کہ شوخ طرح دار آ ہی گیا

ہاں وہ جان مے کدہ مستانہ وار آ ہی گیا

درد کی شدت ہی آخر درد کا درماں بنی

بے قراری سے مجھے آخر قرار آ ہی گیا

یاد تھے ان کے مجھے سب عہد و پیماں توڑنے

وعدۂ فردا پہ لیکن اعتبار آ ہی گیا

موت لائی ہے پیام اختتام رنج و غم

آ گیا وہ وقت بعد انتظار آ ہی گیا

اس طرف جوش محبت اس طرف جوش شباب

آ گیا ہاں ان پہ دل بے اختیار آ ہی گیا

ذوق خود بینی نے دکھلائی سحرؔ اپنی بہار

حسن کے معصوم چہرے پر نکھار آ ہی گیا