aish-e-rafta ka yahi hai wo shabistan ai dost

aish-e-rafta kā yahī hai vo shabistāñ ai dost

yahīñ ḳhvābīda thī ārām-e-dil-o-jāñ ai dost

be-ḳhabar sone meñ vo jism khulā shānoñ tak

jaise jannat kā na ho koī nigahbāñ ai dost

saaz hāthoñ meñ uThāyā tirī añgḌā.ī ne

chūḌiyāñ pahlū badalte hī ġhazal-ḳhvāñ ai dost

pesh-e-ā.īna masahrī pe khule gesū-e-nāz

duur bādal meñ koī hūr-e-pareshāñ ai dost

muḳhtalif vaz' tire husn ko malbūs ne dī

shauq ke maiñ ne tarāshe ka.ī 'unvāñ ai dost

roknā ghar tujhe jaane se ba-ḳhauf-e-hijrāñ

jāguzīñ dil meñ tire yaad azīzāñ ai dost

jo umañgoñ ko udāsī ke havāle kar de

aah vo tund-mizājī-e-buzurgāñ ai dost

naqsh hai vaqt kī peshānī pe ahd-e-rañgīñ

ham se go ruk na sakī 'umr-e-gurezāñ ai dost

aish-e-rafta ka yahi hai wo shabistan ai dost

yahin KHwabida thi aaram-e-dil-o-jaan ai dost

be-KHabar sone mein wo jism khula shanon tak

jaise jannat ka na ho koi nigahban ai dost

saz hathon mein uThaya teri angDai ne

chuDiyan pahlu badalte hi ghazal-KHwan ai dost

pesh-e-aina masahri pe khule gesu-e-naz

dur baadal mein koi hur-e-pareshan ai dost

muKHtalif waz' tere husn ko malbus ne di

shauq ke main ne tarashe kai 'unwan ai dost

rokna ghar tujhe jaane se ba-KHauf-e-hijran

jaguzin dil mein tere yaad azizan ai dost

jo umangon ko udasi ke hawale kar de

aah wo tund-mizaji-e-buzurgan ai dost

naqsh hai waqt ki peshani pe ahd-e-rangin

hum se go ruk na saki 'umr-e-gurezan ai dost