ajib shaKHs hun fart-e-wabaal hote hue

ajiib shaḳhs huuñ fart-e-vabāl hote hue

firāq maañg rahā huuñ visāl hote hue

niDhāl apne tamāshā.iyoñ ke jhurmuT meñ

maiñ ḳhud ko dekh rahā huuñ ḳhayāl hote hue

bas ek varzish-e-tahrīr lauh-e-hastī par

bas ik savāl kī dhun ḳhud savāl hote hue

kuchh is kamāl se rauñdā gayā huuñ mastī meñ

bahut sukūn hai ab pā.emāl hote hue

sharār-e-sañg ko kyā ab bhī isti.āra kahūñ

in āñsuoñ kī ye zinda misāl hote hue

guzar gayā huuñ misāl-e-zamāna ḳhud par se

maiñ lamha lamha alal-ittisāl hote hue

maiñ apne aks ko 'āsim' ḳhudā samajh baiThā

ḳhatā huī thī ye mahv-e-jamāl hote hue

ajib shaKHs hun fart-e-wabaal hote hue

firaq mang raha hun visal hote hue

niDhaal apne tamashaiyon ke jhurmuT mein

main KHud ko dekh raha hun KHayal hote hue

bas ek warzish-e-tahrir lauh-e-hasti par

bas ek sawal ki dhun KHud sawal hote hue

kuchh is kamal se raunda gaya hun masti mein

bahut sukun hai ab paemal hote hue

sharar-e-sang ko kya ab bhi istiara kahun

in aansuon ki ye zinda misal hote hue

guzar gaya hun misal-e-zamana KHud par se

main lamha lamha alal-ittisal hote hue

main apne aks ko 'asim' KHuda samajh baiTha

KHata hui thi ye mahw-e-jamal hote hue