apne is shauq kā iz.hār kareñ bhī ki nahīñ
pyaar vaise bhī hai dushvār kareñ bhī ki nahīñ
kyā zarūrī hai ye iqrār kī muhtāj rahe
ham mohabbat ko yuuñ lāchār kareñ bhī ki nahīñ
ho ga.iiñ ishq kī nīlām dukāneñ kitnī
ye ḳhasāre kā hai bevpār kareñ bhī ki nahīñ
kahte haiñ is se mohabbat kā maza baḌhtā hai
karnī hai chhoTī sī takrār kareñ bhī ki nahīñ
hai ḳhabar aaj to qātil haiñ adā.eñ un kī
jaan le saktā hai dīdār kareñ bhī ki nahīñ
Dagmagā jā.egī jo dekh le un āñkhoñ meñ
apnī niyyat ko yuuñ sarshār kareñ bhī ki nahīñ
ishq hai vo hasīñ ġhalatī ki 'navā' pūchhte haiñ
ik dafa ho ga.ī har baar kareñ bhī ki nahīñ
apne is shauq ka izhaar karen bhi ki nahin
pyar waise bhi hai dushwar karen bhi ki nahin
kya zaruri hai ye iqrar ki muhtaj rahe
hum mohabbat ko yun lachaar karen bhi ki nahin
ho gain ishq ki nilam dukanen kitni
ye KHasare ka hai bewpar karen bhi ki nahin
kahte hain is se mohabbat ka maza baDhta hai
karni hai chhoTi si takrar karen bhi ki nahin
hai KHabar aaj to qatil hain adaen un ki
jaan le sakta hai didar karen bhi ki nahin
Dagmaga jaegi jo dekh le un aankhon mein
apni niyyat ko yun sarshaar karen bhi ki nahin
ishq hai wo hasin ghalati ki 'nawa' puchhte hain
ek dafa ho gai har bar karen bhi ki nahin
Source:
Word File Mail By Salim Saleem
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.