apne mazi ko charaghon mein basar humne kiya

apne maazī ko charāġhoñ meñ basar ham ne kiyā

kaT ga.ī raat to dīdār-e-sahar ham ne kiyā

sirf jañgeñ hī nahīñ jiitī haiñ haiñ is duniyā meñ

ma.arka ishq ke maidāñ kā bhī sar ham ne kiyā

dekhne vāloñ kī hairat kā Thikāna na rahā

ek patthar ko jo chamkā ke guhar ham ne kiyā

chāñd meñ aks nazar aayā hai terā jab se

husn vaale tujhe manzūr-e-nazar ham ne kiyā

kaun sach boltā hai zālim-o-jābir ke ḳhilāf

kaam duniyā meñ ye be-ḳhauf-o-ḳhatar ham ne kiyā

bhuul paanā use āsāñ to nahīñ thā yaaro

kaam ye thoḌā sā mushkil thā magar ham ne kiyā

tab kahīñ jā ke ġhazal rañg hai laa.ī 'rahbar'

sirf ash.ār meñ jab ḳhūn-e-jigar ham ne kiyā

apne mazi ko charaghon mein basar hum ne kiya

kaT gai raat to didar-e-sahar hum ne kiya

sirf jangen hi nahin jiti hain hain is duniya mein

marka ishq ke maidan ka bhi sar hum ne kiya

dekhne walon ki hairat ka Thikana na raha

ek patthar ko jo chamka ke guhar hum ne kiya

chand mein aks nazar aaya hai tera jab se

husn wale tujhe manzur-e-nazar hum ne kiya

kaun sach bolta hai zalim-o-jabir ke KHilaf

kaam duniya mein ye be-KHauf-o-KHatar hum ne kiya

bhul pana use aasan to nahin tha yaro

kaam ye thoDa sa mushkil tha magar hum ne kiya

tab kahin ja ke ghazal rang hai lai 'rahbar'

sirf ashaar mein jab KHun-e-jigar hum ne kiya