apne mazi se jo wirse mein mile hain hum ko

apne maazī se jo virse meñ mile haiñ ham ko

un usūloñ kī tijārat nahīñ hogī ham se

ahd-e-hāzir kī har ik baat hameñ dil se qubūl

sirf tauhīn-e-rivāyat nahīñ hogī ham se

jhuuT bhī boleñ sadāqat ke payambar bhī baneñ

ham ko baḳhsho ye siyāsat nahīñ hogī ham se

zaḳhm bhī khā.eñ raqīboñ ko duā.eñ bhī deñ

itnī maḳhdūsh sharāfat nahīñ hogī ham se

surḳh patthar ke sanam hoñ ki vo patthar ke sanam

but-kadoñ meñ to ibādat nahīñ hogī ham se

hai itā.at ke liye apnā faqat ek ḳhudā

na ḳhudāoñ kī itā.at nahīñ hogī ham se

ġhair-mashrūt rifāqat ke taraf-dār haiñ ham

shart ke saath rifāqat nahīñ hogī ham se

fikr-o-iz.hār meñ ham hukm ke pāband nahīñ

shā.irī hasb-e-hidāyāt nahīñ hogī ham se

sirf bāteñ hī agar aap gavāra kar leñ

aap ko koī shikāyat nahīñ hogī ham se

apne mazi se jo wirse mein mile hain hum ko

un usulon ki tijarat nahin hogi hum se

ahd-e-hazir ki har ek baat hamein dil se qubul

sirf tauhin-e-riwayat nahin hogi hum se

jhuT bhi bolen sadaqat ke payambar bhi banen

hum ko baKHsho ye siyasat nahin hogi hum se

zaKHm bhi khaen raqibon ko duaen bhi den

itni maKHdush sharafat nahin hogi hum se

surKH patthar ke sanam hon ki wo patthar ke sanam

but-kadon mein to ibaadat nahin hogi hum se

hai itaat ke liye apna faqat ek KHuda

na KHudaon ki itaat nahin hogi hum se

ghair-mashrut rifaqat ke taraf-dar hain hum

shart ke sath rifaqat nahin hogi hum se

fikr-o-izhaar mein hum hukm ke paband nahin

shairi hasb-e-hidayat nahin hogi hum se

sirf baaten hi agar aap gawara kar len

aap ko koi shikayat nahin hogi hum se