apni KHata ki rakh ke dil zauq-e-KHalish na pa sake

apnī ḳhatā ki rakh ke dil zauq-e-ḳhalish na pā sake

aql kī jhiḌkiyāñ sahīñ par na fareb khā sake

hijr bhī ek vahm hai vasl bhī ik fareb thā

kho ke na tum ko kho sake pā ke na tum ko pā sake

terī nazar ne bazm meñ uTh ke hameñ biThā diyā

uTThe to baar baar ham uTh ke magar na jā sake

jur.at-e-tark-e-āshiqī mujh se na ho sakī kabhī

apne ko aazmā liyā tum ko na aazmā sake

kahte haiñ ma.arifat jise vo bhī hai e'tirāf-e-ijz

us ko ḳhudā samajh liyā jo na samajh meñ aa sake

ishq usī kā mustanad shauq usī kā mo'atabar

terī nigāh se bhī jo rāz-e-nazar chhupā sake

bas isī talḳh yaad par ḳhatm hai dāstān-e-dil

tum ne hameñ bhulā diyā ham na tumheñ bhulā sake

aa.e vo mai-kade meñ kyoñ us kī jagah haram meñ hai

aañkh bachā ke jo piye pī ke na laḌkhaḌā sake

vo jo hai banda-e-vafā kahte haiñ sab jise 'razā'

us kī bhalā majāl kyā tum se nazar milā sake

apni KHata ki rakh ke dil zauq-e-KHalish na pa sake

aql ki jhiDkiyan sahin par na fareb kha sake

hijr bhi ek wahm hai wasl bhi ek fareb tha

kho ke na tum ko kho sake pa ke na tum ko pa sake

teri nazar ne bazm mein uTh ke hamein biTha diya

uTThe to bar bar hum uTh ke magar na ja sake

jurat-e-tark-e-ashiqi mujh se na ho saki kabhi

apne ko aazma liya tum ko na aazma sake

kahte hain marifat jise wo bhi hai e'tiraf-e-ijz

us ko KHuda samajh liya jo na samajh mein aa sake

ishq usi ka mustanad shauq usi ka mo'atabar

teri nigah se bhi jo raaz-e-nazar chhupa sake

bas isi talKH yaad par KHatm hai dastan-e-dil

tum ne hamein bhula diya hum na tumhein bhula sake

aae wo mai-kade mein kyon us ki jagah haram mein hai

aankh bacha ke jo piye pi ke na laDkhaDa sake

wo jo hai banda-e-wafa kahte hain sab jise 'raza'

us ki bhala majal kya tum se nazar mila sake