ashk ho aankhen bhigona ho to phir

ashk ho āñkheñ bhigonā ho to phir

aañkh meñ sapnā salonā ho to phir

kab talak baḳhiya-garī kā shauq bhī

umr bhar siinā pironā ho to phir

dost internet par achchhā chalo

aur gale jo lag ke ronā ho to phir

vo mirī dil-jūī ko hāzir magar

us kā honā bhī na honā ho to phir

us ko paane kī talab par soch lo

us ko paanā us ko khonā ho to phir

nāzukī to sīkhī us ne phuul se

titliyoñ kā bojh Dhonā ho to phir

yuuñ jo ḳhush ho us ko hañstā dekh kar

us kā hañsnā us kā ronā ho to phir

yuuñ to gajroñ se kalā.ī saj ga.ī

chaah us kī chāñdī sonā ho to phir

log kahte haiñ ki duniyā gol hai

muflisī konā-ba-konā ho to phir

'ahmad' apne dil ko ḳhush karne chale

aur ġham dil kā khilaunā ho to phir

ashk ho aankhen bhigona ho to phir

aankh mein sapna salona ho to phir

kab talak baKHiya-gari ka shauq bhi

umr bhar sina pirona ho to phir

dost internet par achchha chalo

aur gale jo lag ke rona ho to phir

wo meri dil-jui ko hazir magar

us ka hona bhi na hona ho to phir

us ko pane ki talab par soch lo

us ko pana us ko khona ho to phir

nazuki to sikhi us ne phul se

titliyon ka bojh Dhona ho to phir

yun jo KHush ho us ko hansta dekh kar

us ka hansna us ka rona ho to phir

yun to gajron se kalai saj gai

chah us ki chandi sona ho to phir

log kahte hain ki duniya gol hai

muflisi kona-ba-kona ho to phir

'ahmad' apne dil ko KHush karne chale

aur gham dil ka khilauna ho to phir