azab-e-did ka muzhda suna raha hai mujhe

azāb-e-dīd kā muzhda sunā rahā hai mujhe

kisī kī baat sunā kar jalā rahā hai mujhe

vo apne sach ko kabhī kar nahīñ sakā sābit

jo ek 'umr se jhūTā banā rahā hai mujhe

jo shaḳhs miim ke mafhūm tak nahīñ pahuñchā

ḳhudā kī shaan mohabbat sikhā rahā hai mujhe

use 'urūj kā mafhūm aa gayā hai samajh

so is liye bhī nazar se haTā rahā hai mujhe

hisār-e-ranj-o-alam TūTtā nahīñ kyūñ-kar

ye hādsāt kā ronā rulā rahā hai mujhe

maiñ be-yaqīnī ke sahrā ko paar to kar luuñ

magar jo ek samundar bulā rahā hai mujhe

azab-e-did ka muzhda suna raha hai mujhe

kisi ki baat suna kar jala raha hai mujhe

wo apne sach ko kabhi kar nahin saka sabit

jo ek 'umr se jhuTa bana raha hai mujhe

jo shaKHs mim ke mafhum tak nahin pahuncha

KHuda ki shan mohabbat sikha raha hai mujhe

use 'uruj ka mafhum aa gaya hai samajh

so is liye bhi nazar se haTa raha hai mujhe

hisar-e-ranj-o-alam TuTta nahin kyun-kar

ye hadsat ka rona rula raha hai mujhe

main be-yaqini ke sahra ko par to kar lun

magar jo ek samundar bula raha hai mujhe