ba-waqt-e-asr jab ashya ke sae baDhne lage

ba-vaqt-e-'asr jab ashyā ke saa.e baḌhne lage

ham ik makāñ kī taraf sar jhukā.e baḌhne lage

kisī galī meñ kirā.e pe ghar liyā us ne

phir us galī meñ gharoñ ke kirā.e baḌhne lage

maiñ chāhtā huuñ ki ab ham samundaroñ ke biich

zamīñ nigaltī koī ābnā.e baḌhne lage

phir aaj ghar se nikal kar na.ī thakan kī taraf

purāne din kī thakan ko uThā.e baḌhne lage

thī tark-e-nisbat-o-tarka meñ nisbat-e-mā'kūs

so jā.edād ghaTī to parā.e baḌhne lage

maiñ chāhtā huuñ tū mere ḳhilāf bolā kar

maiñ chāhtā huuñ tire haq meñ raa.e baḌhne lage

kisī bhī shai kā junūñ bhūkh kī tarah hai 'umair'

ki is ko jitnā bhī koī baḌhā.e baḌhne lage

ba-waqt-e-'asr jab ashya ke sae baDhne lage

hum ek makan ki taraf sar jhukae baDhne lage

kisi gali mein kirae pe ghar liya us ne

phir us gali mein gharon ke kirae baDhne lage

main chahta hun ki ab hum samundaron ke bich

zamin nigalti koi aabnae baDhne lage

phir aaj ghar se nikal kar nai thakan ki taraf

purane din ki thakan ko uThae baDhne lage

thi tark-e-nisbat-o-tarka mein nisbat-e-ma'kus

so jaedad ghaTi to parae baDhne lage

main chahta hun tu mere KHilaf bola kar

main chahta hun tere haq mein rae baDhne lage

kisi bhi shai ka junun bhukh ki tarah hai 'umair'

ki is ko jitna bhi koi baDhae baDhne lage