baja hai ab to karam mein koi kalam nahin

bajā hai ab to karam meñ koī kalām nahīñ

nigāh-e-ḳhās hai mujh par nigāh-e-ām nahīñ

bujhe bujhe se haiñ lail-o-nahār ke fānūs

ziyā-e-mehr nahīñ hai mah-e-tamām nahīñ

nahīñ hai jis meñ tire zulf-o-ruḳh kī parchhā.īñ

vo sub.h sub.h nahīñ hai vo shaam shaam nahīñ

na ham ko jur.at-e-tahrīr-e-shauq hai na unheñ

kisī taraf se koī nāma-o-payām nahīñ

vo baat jo nigah-e-mubtalā ne keh Daalī

vo ek baat hī kyā hāsil-e-kalām nahīñ

haiñ laakh band-e-salāsil ke baa'd bhī āzād

asīr-e-zulf haiñ tere asīr-e-dām nahīñ

sunā.eñ kaise dam-e-naz’ apnā afsānā

nafas tamām fasāna abhī tamām nahīñ

tamām 'ālam-e-tā'mīr kaañp uTThegā

shikast-e-dil hai ye saaqī shikast-e-jām nahīñ

numūd-o-nām kā ehsās ḳhaam hai 'parvāz'

mire kalām kā hāsil numūd-o-nām nahīñ

baja hai ab to karam mein koi kalam nahin

nigah-e-KHas hai mujh par nigah-e-am nahin

bujhe bujhe se hain lail-o-nahaar ke fanus

ziya-e-mehr nahin hai mah-e-tamam nahin

nahin hai jis mein tere zulf-o-ruKH ki parchhain

wo subh subh nahin hai wo sham sham nahin

na hum ko jurat-e-tahrir-e-shauq hai na unhen

kisi taraf se koi nama-o-payam nahin

wo baat jo nigah-e-mubtala ne keh Dali

wo ek baat hi kya hasil-e-kalam nahin

hain lakh band-e-salasil ke ba'd bhi aazad

asir-e-zulf hain tere asir-e-dam nahin

sunaen kaise dam-e-naz’ apna afsana

nafas tamam fasana abhi tamam nahin

tamam 'alam-e-ta'mir kanp uTThega

shikast-e-dil hai ye saqi shikast-e-jam nahin

numud-o-nam ka ehsas KHam hai 'parwaz'

mere kalam ka hasil numud-o-nam nahin