be-samar sohbaton se behtar hain

be-samar sohbatoñ se behtar haiñ

ranjisheñ ulfatoñ se behtar haiñ

saañp achchhe nahīñ yaqīnan na.iiñ

par mire dostoñ se behtar haiñ

hāsil-e-ishq hai ye ik jumla

fāsle qurbatoñ se behtar haiñ

kārhā-e-havas meñ haiñ mashġhūl

mashġhale fursatoñ se behtar haiñ

rāste rāstī ke mat chhoḌo

vādiyāñ parbatoñ se behtar haiñ

qufl behtar nahīñ zabānoñ par

haañ magar ġhībatoñ se behtar haiñ

ham haiñ behtar ka.ī balāoñ se

vo ka.ī āfatoñ se behtar haiñ

aap aur ham meñ farq hai itnā

aap kuchh nisbatoñ se behtar haiñ

bad-gumānoñ se dūriyāñ 'āsī'

ḳhvā-maḳhvāh hujjatoñ se behtar haiñ

be-samar sohbaton se behtar hain

ranjishen ulfaton se behtar hain

sanp achchhe nahin yaqinan nain

par mere doston se behtar hain

hasil-e-ishq hai ye ek jumla

fasle qurbaton se behtar hain

karha-e-hawas mein hain mashghul

mashghale fursaton se behtar hain

raste rasti ke mat chhoDo

wadiyan parbaton se behtar hain

qufl behtar nahin zabanon par

han magar ghibaton se behtar hain

hum hain behtar kai balaon se

wo kai aafaton se behtar hain

aap aur hum mein farq hai itna

aap kuchh nisbaton se behtar hain

bad-gumanon se duriyan 'asi'

KHwa-maKHwah hujjaton se behtar hain