bhala kab tak yunhi ye kar-e-isari karenge hum

bhalā kab tak yuñhī ye kār-e-īsārī kareñge ham

ki vo chorī kiye jā.eñge aur yaarī kareñge ham

ḳhulūs-e-ḳhvāb-o-ḳhvāhish ab kisī ko ḳhush nahīñ aatā

chalo achchhā hai ā.inda adākārī kareñge ham

vo ḳhushbū hai to us ko chuum kar rakh leñge siine meñ

vo nashsha hai to apne aap par taarī kareñge ham

bahut mā'sūm ho tum lekin itnā to samajh hī lo

tum aisoñ se bhalā kyā koī 'ayyārī kareñge ham

ḳhumār-e-ḳhvāb se aage hī chalnā ho gayā dūbhar

tamannā kī ye gaThrī aur kyā bhārī kareñge ham

zabāñ par ek muddat se kasīlā-pan to hai lekin

ab aisā bhī nahīñ har samt muñh-mārī kareñge ham

bahut din ho ga.e haiñ jāgtī āñkhoñ ke ḳhvāboñ meñ

ab apnī niiñd meñ thoḌī sī bedārī kareñge ham

bhala kab tak yunhi ye kar-e-isari karenge hum

ki wo chori kiye jaenge aur yari karenge hum

KHulus-e-KHwab-o-KHwahish ab kisi ko KHush nahin aata

chalo achchha hai aainda adakari karenge hum

wo KHushbu hai to us ko chum kar rakh lenge sine mein

wo nashsha hai to apne aap par tari karenge hum

bahut ma'sum ho tum lekin itna to samajh hi lo

tum aison se bhala kya koi 'ayyari karenge hum

KHumar-e-KHwab se aage hi chalna ho gaya dubhar

tamanna ki ye gaThri aur kya bhaari karenge hum

zaban par ek muddat se kasila-pan to hai lekin

ab aisa bhi nahin har samt munh-mari karenge hum

bahut din ho gae hain jagti aankhon ke KHwabon mein

ab apni nind mein thoDi si bedari karenge hum