dard patjhaD ke sare hamare hue

dard patjhaḌ ke saare hamāre hue

sab bahāroñ ke mausam tumhāre hue

hasrat-e-dīd le ke hī jaañ se ga.e

shauq-e-dīdār ke jo the maare hue

raas aa.ī na saudāgarī pyaar kī

ham ko is kaam se bas ḳhasāre hue

aa ga.e phir se vo to zad-e-chashm-e-bad

ghar se nikle nazar jo utāre hue

saath us ke jo niklā sar-e-rāh maiñ

jaane kis kis taraf se ishāre hue

ghar to Duubā thā paanī meñ tuġhyānī se

phir bhī rusvā nadī ke kināre hue

kaise pahchān leñ ham kisī ko yahāñ

log haiñ ruup par ruup dhāre hue

jiit kar ham se 'āriz' bahut ḳhush the vo

kitne masrūr the ham bhī haare hue

dard patjhaD ke sare hamare hue

sab bahaaron ke mausam tumhaare hue

hasrat-e-did le ke hi jaan se gae

shauq-e-didar ke jo the mare hue

ras aai na saudagari pyar ki

hum ko is kaam se bas KHasare hue

aa gae phir se wo to zad-e-chashm-e-bad

ghar se nikle nazar jo utare hue

sath us ke jo nikla sar-e-rah main

jaane kis kis taraf se ishaare hue

ghar to Duba tha pani mein tughyani se

phir bhi ruswa nadi ke kinare hue

kaise pahchan len hum kisi ko yahan

log hain rup par rup dhaare hue

jit kar hum se 'ariz' bahut KHush the wo

kitne masrur the hum bhi haare hue