دھڑکن میں دل کی خود کو جو تشکیل کر گیا

دھڑکن میں دل کی خود کو جو تشکیل کر گیا

ہر زاویہ نگاہ کا تبدیل کر گیا

میرے بغیر جس کو تھا جینا محال کیوں

تنہا مسافتوں کی وہ تکمیل کر گیا

جس کو مسرتوں کی دعائیں دیں عمر بھر

دکھ کی کتاب وہ مجھے ترسیل کر گیا

دشت وفا میں پاؤں کے چھالوں کا کیا شمار

تھا عزم سنگلاخ کو تحلیل کر گیا

سوچا تھا اپنے دل کا بھی احوال کچھ کہیں

چہرہ بیان درد کی تفصیل کر گیا

گزرا ہے حق کے واسطے دار و رسن سے جو

جھوٹے خداؤں کی وہی تذلیل کر گیا

منظر کچھ ایسے خونچکاں آئے نگاہ میں

جیسے کہ درد کو کوئی تمثیل کر گیا