din bhale jaisa kaTe sanjh samay KHwab to dekh

din bhale jaisā kaTe sāñjh samay ḳhvāb to dekh

chhoḌ ta.abīr ke ḳhadshoñ ko are ḳhvāb to dekh

jhoñpaḌī meñ hī banā apne ḳhayāloñ kā mahal

go purānā hai bichhaunā to na.e ḳhvāb to dekh

terā har ḳhvāb masarrat kī bashārat laa.e

sach tire ḳhvāb hoñ allāh kare ḳhvāb to dekh

dil shikasta maiñ huā jab bhī mirā dil TuuTā

hausle aage baḌhe kahne lage ḳhvāb to dekh

tujhe vo baat bhī aa.egī samajh yaar mire

jo hai idrāk kī sarhad se pare ḳhvāb to dekh

gutthiyāñ saarī sulajh jaa.eñ ki hoñ aur sivā

tū zarā haath baḌhā thaam sire ḳhvāb to dekh

niiñd ke ḳhvāb tire ḳhauf ke ghar haiñ bhī to kyā

niiñd ko chhoḌ to jab sub.h uThe ḳhvāb to dekh

din bhale jaisa kaTe sanjh samay KHwab to dekh

chhoD tabir ke KHadshon ko are KHwab to dekh

jhonpaDi mein hi bana apne KHayalon ka mahal

go purana hai bichhauna to nae KHwab to dekh

tera har KHwab masarrat ki bashaarat lae

sach tere KHwab hon allah kare KHwab to dekh

dil shikasta main hua jab bhi mera dil TuTa

hausle aage baDhe kahne lage KHwab to dekh

tujhe wo baat bhi aaegi samajh yar mere

jo hai idrak ki sarhad se pare KHwab to dekh

gutthiyan sari sulajh jaen ki hon aur siwa

tu zara hath baDha tham sire KHwab to dekh

nind ke KHwab tere KHauf ke ghar hain bhi to kya

nind ko chhoD to jab subh uThe KHwab to dekh