dost ban kar doston ki bewafai dekhiye

dost ban kar dostoñ kī bevafā.ī dekhiye

kaj-adā.ī dekhiye be-e'tinā.ī dekhiye

rahguzār-e-shauq meñ ham rakh to baiThe haiñ qadam

jaane kab manzil pe ho apnī rasā.ī dekhiye

kis balā kā sehr thā un kī nigāh-e-nāz meñ

dil ne ḳhud baḌh kar nazar kī choT khaa.ī dekhiye

mere sajdoñ ke muqaddar meñ vo sañg-e-dar na thā

merī peshānī pe dāġh-e-nā-rasā.ī dekhiye

ishq meñ nām-o-nasab kā kis ko rahtā hai ḳhayāl

hai nasīb-e-ishq meñ to jag-hañsā.ī dekhiye

zindagī meñ ham ne dekhīñ uljhaneñ hī uljhaneñ

uljhanoñ se kis tarah hogī rihā.ī dekhiye

zindagī kā ek pal bhī chain se guzrā nahīñ

jab se kī taslīm dil kī rahnumā.ī dekhiye

aap ne nārāz ho kar jab se āñkheñ pher liiñ

merī dushman ban ga.ī saarī ḳhudā.ī dekhiye

jal rahī huuñ kab se ai shahnāz apnī aag meñ

ab sarīr-e-ḳhāma kī sho.ala-navā.ī dekhiye

dost ban kar doston ki bewafai dekhiye

kaj-adai dekhiye be-e'tinai dekhiye

rahguzar-e-shauq mein hum rakh to baiThe hain qadam

jaane kab manzil pe ho apni rasai dekhiye

kis bala ka sehr tha un ki nigah-e-naz mein

dil ne KHud baDh kar nazar ki choT khai dekhiye

mere sajdon ke muqaddar mein wo sang-e-dar na tha

meri peshani pe dagh-e-na-rasai dekhiye

ishq mein nam-o-nasab ka kis ko rahta hai KHayal

hai nasib-e-ishq mein to jag-hansai dekhiye

zindagi mein hum ne dekhin uljhanen hi uljhanen

uljhanon se kis tarah hogi rihai dekhiye

zindagi ka ek pal bhi chain se guzra nahin

jab se ki taslim dil ki rahnumai dekhiye

aap ne naraaz ho kar jab se aankhen pher lin

meri dushman ban gai sari KHudai dekhiye

jal rahi hun kab se ai shahnaz apni aag mein

ab sarir-e-KHama ki shoala-nawai dekhiye