duniya se be-niyaz ghazal kah raha hun main

duniyā se be-niyāz ġhazal kah rahā huuñ maiñ

qalb-o-jigar navāz ġhazal kah rahā huuñ maiñ

ai dil zarā Thahar ki haiñ sehn-e-chaman meñ vo

mahv-e-ḳhirām-e-nāz ġhazal kah rahā huuñ maiñ

chhalke tire jamāl kī rañgīniyāñ kuchh aur

ik aisī dil-navāz ġhazal kah rahā huuñ maiñ

kartā huuñ be-naqāb ruḳh-e-raushan-e-hayāt

parda-kushā-e-rāz ġhazal kah rahā huuñ maiñ

mastī meñ taaki guzre merī shām-e-zindagī

ai mere kārsāz ġhazal kah rahā huuñ maiñ

in nāzuk uñgliyoñ se zarā muskurā ke chheḌ

dhīme se koī saaz ġhazal kah rahā huuñ maiñ

sāġhar-ba-dast aayā hai saaqī bahār meñ

bas ho chukī namāz ġhazal kah rahā huuñ maiñ

us tīr-e-nīm-kash kā mazā ho mujhe atā

ai chashm-e-nīm-bāz ġhazal kah rahā huuñ maiñ

tanhā.iyoñ meñ raat kī yād-e-'habīb' ne

chheḌā hai dil kā saaz ġhazal kah rahā huuñ maiñ

duniya se be-niyaz ghazal kah raha hun main

qalb-o-jigar nawaz ghazal kah raha hun main

ai dil zara Thahar ki hain sehn-e-chaman mein wo

mahw-e-KHiram-e-naz ghazal kah raha hun main

chhalke tere jamal ki ranginiyan kuchh aur

ek aisi dil-nawaz ghazal kah raha hun main

karta hun be-naqab ruKH-e-raushan-e-hayat

parda-kusha-e-raaz ghazal kah raha hun main

masti mein taki guzre meri sham-e-zindagi

ai mere karsaz ghazal kah raha hun main

in nazuk ungliyon se zara muskura ke chheD

dhime se koi saz ghazal kah raha hun main

saghar-ba-dast aaya hai saqi bahaar mein

bas ho chuki namaz ghazal kah raha hun main

us tir-e-nim-kash ka maza ho mujhe ata

ai chashm-e-nim-baz ghazal kah raha hun main

tanhaiyon mein raat ki yaad-e-'habib' ne

chheDa hai dil ka saz ghazal kah raha hun main