hadis-e-dil-baran hai aur main hun

hadīs-e-dil-barāñ hai aur maiñ huuñ

jahāñ-andar-jahāñ hai aur maiñ huuñ

mudāvā-e-ġham-e-furqat nahīñ kuchh

bas un kī dāstāñ hai aur maiñ huuñ

na hamdam hai na koī ham-navāñ hai

dil apnā rāzdāñ hai aur maiñ huuñ

bharī mahfil meñ bhī baiThā huuñ tanhā

mirā dard-e-nihāñ hai aur maiñ huuñ

nahīñ dard-āshnā jis se kahūñ kuchh

mire muñh meñ zabāñ hai aur maiñ huuñ

bahār aa.ī chaman meñ aa.ī hogī

yahāñ daur-e-ḳhizāñ hai aur maiñ huuñ

nahīñ baaqī vo naġhma aur tarāna

bas ik hū kā samāñ hai aur maiñ huuñ

na vo saaqī na vo ham-mashrab apne

jumūd-e-mai-kashāñ hai aur maiñ huuñ

kabhī is dil kī zad meñ thā zamāna

ab ik utrī kamāñ hai aur maiñ huuñ

nahīñ mohlat ki dam bhar muḌ ke dekhūñ

mirī umr-e-ravāñ hai aur maiñ huuñ

na ḳhud apnā na apne haiñ shab-o-roz

razā-e-dīgarāñ hai aur maiñ huuñ

huā bezār nāqūs-e-azāñ se

fareb-e-īn-o-āñ hai aur maiñ huuñ

kabhī kā jal chukā go āshiyāna

ḳhayāl-e-āshiyāñ hai aur maiñ huuñ

'habīb' ab zindagī kī shaam aa.ī

ġham-e-sūd-o-ziyāñ hai aur maiñ huuñ

hadis-e-dil-baran hai aur main hun

jahan-andar-jahan hai aur main hun

mudawa-e-gham-e-furqat nahin kuchh

bas un ki dastan hai aur main hun

na hamdam hai na koi ham-nawan hai

dil apna raazdan hai aur main hun

bhari mahfil mein bhi baiTha hun tanha

mera dard-e-nihan hai aur main hun

nahin dard-ashna jis se kahun kuchh

mere munh mein zaban hai aur main hun

bahaar aai chaman mein aai hogi

yahan daur-e-KHizan hai aur main hun

nahin baqi wo naghma aur tarana

bas ek hu ka saman hai aur main hun

na wo saqi na wo ham-mashrab apne

jumud-e-mai-kashan hai aur main hun

kabhi is dil ki zad mein tha zamana

ab ek utri kaman hai aur main hun

nahin mohlat ki dam bhar muD ke dekhun

meri umr-e-rawan hai aur main hun

na KHud apna na apne hain shab-o-roz

raza-e-digaran hai aur main hun

hua bezar naqus-e-azan se

fareb-e-in-o-an hai aur main hun

kabhi ka jal chuka go aashiyana

KHayal-e-ashiyan hai aur main hun

'habib' ab zindagi ki sham aai

gham-e-sud-o-ziyan hai aur main hun