ek faqat KHud se gila baqi raha

ik faqat ḳhud se gilā baaqī rahā

varna is dil meñ to kyā baaqī rahā

ik taraf terī kamī khaltī rahī

ik taraf apnā ḳhalā baaqī rahā

raah kī āsāniyāñ jaatī rahīñ

manziloñ kā marhala baaqī rahā

zindagī-dar-zindagī chaltī rahī

mas.ala-dar-mas.ala baaqī rahā

ham had-e-idrāk se majbūr the

ham se jo thā māvarā baaqī rahā

ho raheñge ham bhī us ke ek din

haañ agar dil meñ ḳhudā baaqī rahā

shahr-e-dil ke bā-vafā jab kho ga.e

āḳhirash ik be-vafā baaqī rahā

dil se terī yaad bhī ruḳhsat huī

aur ab kyā mo.ajiza baaqī rahā

ai dil-e-nākām kuchh to kar guzar

yā abhī kuchh sochnā baaqī rahā

ek faqat KHud se gila baqi raha

warna is dil mein to kya baqi raha

ek taraf teri kami khalti rahi

ek taraf apna KHala baqi raha

rah ki aasaniyan jati rahin

manzilon ka marhala baqi raha

zindagi-dar-zindagi chalti rahi

masala-dar-masala baqi raha

hum had-e-idrak se majbur the

hum se jo tha mawara baqi raha

ho rahenge hum bhi us ke ek din

han agar dil mein KHuda baqi raha

shahr-e-dil ke ba-wafa jab kho gae

aaKHirash ek be-wafa baqi raha

dil se teri yaad bhi ruKHsat hui

aur ab kya moajiza baqi raha

ai dil-e-nakaam kuchh to kar guzar

ya abhi kuchh sochna baqi raha