jab teri yaad mein machalta hai

jab tirī yaad meñ machaltā hai

dil sambhāle nahīñ sambhaltā hai

chashm-e-pur-nam pe us kī hairāñ huuñ

kaise patthar kā dil pighaltā hai

us meñ aayā tire shabāb kā rañg

tere hāthoñ jo jaam Dhaltā hai

mujh tak aane kī raah raushan hai

na jale sham.a dil to jaltā hai

kyoñ patañge ko sham.a kī hai talāsh

jalne vaalā to yuuñ hī jaltā hai

daur-e-mai par nigāh hai kis kī

mast āñkhoñ kā daur chaltā hai

dil meñ mere kahāñ añdherā hai

aarzū kā charāġh jaltā hai

tum ko aa.e ki yā na aa.e raas

vaqt to karvaTeñ badaltā hai

silsile aarzū ke chalte haiñ

dil kā armān kab nikaltā hai

jaisī terī nazar badaltī hai

vaise duniyā kā ruḳh badaltā hai

laḌkhaḌāyā to pā gayā manzil

jo bhī sambhlā hai haath maltā hai

jazba-e-dushmanī bhī aaj 'habīb'

pahlū-e-dostī meñ paltā hai

jab teri yaad mein machalta hai

dil sambhaale nahin sambhalta hai

chashm-e-pur-nam pe us ki hairan hun

kaise patthar ka dil pighalta hai

us mein aaya tere shabab ka rang

tere hathon jo jam Dhalta hai

mujh tak aane ki rah raushan hai

na jale shama dil to jalta hai

kyon patange ko shama ki hai talash

jalne wala to yun hi jalta hai

daur-e-mai par nigah hai kis ki

mast aankhon ka daur chalta hai

dil mein mere kahan andhera hai

aarzu ka charagh jalta hai

tum ko aae ki ya na aae ras

waqt to karwaTen badalta hai

silsile aarzu ke chalte hain

dil ka arman kab nikalta hai

jaisi teri nazar badalti hai

waise duniya ka ruKH badalta hai

laDkhaDaya to pa gaya manzil

jo bhi sambhla hai hath malta hai

jazba-e-dushmani bhi aaj 'habib'

pahlu-e-dosti mein palta hai