kab uske dar pe maine dil ki saughat-e-giran rakh di

kab us ke dar pe maiñ ne dil kī sauġhāt-e-girāñ rakh dī

taqāzā-e-mohabbat ne jahāñ chāhā vahāñ rakh dī

mirī be-tābiyoñ ne kar diyā bechain tum ko bhī

tumhārī har adā meñ kab mohabbat ne zabāñ rakh dī

huā kyā barq ne gar phūñk Daalā āshiyāñ merā

ki maiñ ne shāḳh-e-gul par phir binā-e-āshiyāñ rakh dī

jigar meñ hai abhī dam-ḳham abhī hai taab zaḳhmoñ kī

ye kyoñ phir tiir barsāte hue tū ne kamāñ rakh dī

zarā se dil ko kyā kyā vus.ateñ tū ne ḳhudāyā diiñ

yahīñ fikr-e-jahāñ rakh dī yahīñ fikr-e-butāñ rakh dī

rahūñ garm-e-safar umr-e-ravāñ ke lahze lahze meñ

muqaddar ne mirī manzil hī benām-o-nishāñ rakh dī

kabhī sadqe vafāoñ ke karam kī ik nazar bhī ho

jafā hī mahz kyoñ hisse meñ mere mehrbāñ rakh dī

ḳhushā vo vaqt jab gahvāra-e-ulfat meñ ham bhūleñ

man-o-tū kī tamīz ab kyoñ diloñ ke darmiyāñ rakh dī

sabab khultā nahīñ kuchh yāsmīn-o-gul kī chashmak kā

binā kaisī chaman-bandī kī tū ne bāġhbāñ rakh dī

'habīb' in āñso.oñ ko dekh mat chashm-e-hiqārat se

ki har qatre meñ maiñ ne dard kī ik dāstāñ rakh dī

kab us ke dar pe main ne dil ki saughat-e-giran rakh di

taqaza-e-mohabbat ne jahan chaha wahan rakh di

meri be-tabiyon ne kar diya bechain tum ko bhi

tumhaari har ada mein kab mohabbat ne zaban rakh di

hua kya barq ne gar phunk Dala aashiyan mera

ki main ne shaKH-e-gul par phir bina-e-ashiyan rakh di

jigar mein hai abhi dam-KHam abhi hai tab zaKHmon ki

ye kyon phir tir barsate hue tu ne kaman rakh di

zara se dil ko kya kya wusaten tu ne KHudaya din

yahin fikr-e-jahan rakh di yahin fikr-e-butan rakh di

rahun garm-e-safar umr-e-rawan ke lahze lahze mein

muqaddar ne meri manzil hi benam-o-nishan rakh di

kabhi sadqe wafaon ke karam ki ek nazar bhi ho

jafa hi mahz kyon hisse mein mere mehrban rakh di

KHusha wo waqt jab gahwara-e-ulfat mein hum bhulen

man-o-tu ki tamiz ab kyon dilon ke darmiyan rakh di

sabab khulta nahin kuchh yasmin-o-gul ki chashmak ka

bina kaisi chaman-bandi ki tu ne baghban rakh di

'habib' in aansoon ko dekh mat chashm-e-hiqarat se

ki har qatre mein main ne dard ki ek dastan rakh di