تردد میں ہیں سب کعبوں کا بت خانوں کا کیا ہوگا

تردد میں ہیں سب کعبوں کا بت خانوں کا کیا ہوگا

مجھے یہ فکر ہے گمراہ انسانوں کا کیا ہوگا

بہار آتے ہی پہلی بات یہ کہتے ہیں دیوانے

چمن آراستہ ہے ہائے ویرانوں کا کیا ہوگا

حقیقت پھر حقیقت ہے سمجھ لو سوچ لو تم بھی

زباں کھولیں گے ہم جس وقت افسانوں کا کیا ہوگا

غریبوں کو جگہ ملتی نہیں ہے سر چھپانے کو

یہی عالم رہا کچھ دن تو ایوانوں کا کیا ہوگا

بھلا یہ آبروئے جام و مینا رہ بھی سکتی ہے

اگر مے خوار اٹھ جائیں تو مے خانوں کا کیا ہوگا

ہمارے دم سے طوفانوں کا زور و شور قائم ہے

ہمارے ڈوبنے کے بعد طوفانوں کا کیا ہوگا

اسیروں کی رہائی سے کوئی خطرہ نہیں لیکن

نگہبانوں کو یہ ڈر ہے کہ زندانوں کا کیا ہوگا

یہ تبدیلی نظام میکدہ پر ظلم ہے ساقی

تو آنکھوں سے پلا دے گا تو پیمانوں کا کیا ہوگا

بجھا کر شمع خود ہی دیکھ لو اشرفؔ سے مت پوچھو

بجھے گی شمع محفل جب تو پروانوں کا کیا ہوگا