tu mujhe kab bulane aaya tha

tū mujhe kab bulāne aayā thā

maiñ sadā terī raah taktā thā

ik yahī ḳhāmushī thī mere saath

jis se maiñ terī baat kartā thā

chashm-e-nam kyā tujhe batā.egī

terī ḳhātir maiñ kitnā royā thā

tū bhī bāhar nikal ke aayā nahīñ

maiñ bhī us dar pe phir na lauTā thā

mere dil meñ thī ab bhī ek umiid

par kisī ne mujhe na rokā thā

raushnī vaale log milte the

mere dil meñ magar añdherā thā

peḌ kahte the ruk ke saañs to le

mujh ko jaldī kahīñ pahuñchnā thā

rahguzar is qadar na thī sunsān

dil magar jaane kyoñ laraztā thā

phir maiñ pahuñchā usī nadī ke ghaaT

ab mirā tujh se ḳhatm rishta thā

āḳhirī naav khul chukī thī ab

Dūbte mujh ko kis ne dekhā thā

tu mujhe kab bulane aaya tha

main sada teri rah takta tha

ek yahi KHamushi thi mere sath

jis se main teri baat karta tha

chashm-e-nam kya tujhe bataegi

teri KHatir main kitna roya tha

tu bhi bahar nikal ke aaya nahin

main bhi us dar pe phir na lauTa tha

mere dil mein thi ab bhi ek umid

par kisi ne mujhe na roka tha

raushni wale log milte the

mere dil mein magar andhera tha

peD kahte the ruk ke sans to le

mujh ko jaldi kahin pahunchna tha

rahguzar is qadar na thi sunsan

dil magar jaane kyon larazta tha

phir main pahuncha usi nadi ke ghaT

ab mera tujh se KHatm rishta tha

aaKHiri naw khul chuki thi ab

Dubte mujh ko kis ne dekha tha