اٹھایا فائدہ جس نے ہمیشہ بے زبانی کا

اٹھایا فائدہ جس نے ہمیشہ بے زبانی کا

وہی تو مرکزی کردار تھا میری کہانی کا

خیانت بھی نہ ہو پائی تھی روزہ دار آنکھوں سے

وہ کفارے میں کر بیٹھے تقاضا زندگانی کا

سر تسلیم خم کر دے وہ میرے روبرو آ کر

اگر احساس ہو جائے مری آنکھوں کے پانی کا

سر محفل اسی نے کر دیا بے آبرو آخر

کیا کرتا تھا جو دعویٰ ہماری پاسبانی کا

لگے ہیں دل پہ جتنے زخم سب ناسور ہو جاتے

لگا لیتی اگر مرہم تمہاری مہربانی کا

سبھی کچھ چھن چکا ہے در بدر بھی ہو گئے پھر بھی

نشہ اترا نہیں ذہنوں سے اب تک حکمرانی کا

نہیں دیکھا گیا یہ بھی حبیبہؔ اہل دنیا سے

بڑی مشکل سے ہاتھ آیا تھا لمحہ شادمانی کا