ashk bahaya maine

gosha-e-dil meñ terā dard chhupāyā maiñ ne

chashm-e-tar ko bhī na ye raaz batāyā maiñ ne

kaun vo shab hai jo be-ashk bahā.e guzrī

kaun vo ġham hai jo dil par na uThāyā maiñ ne

kī zamāne se kabhī koī shikāyat na gila

apne riste hue zaḳhmoñ ko chhupāyā maiñ ne

ab to dam zabt kī shiddat se ghaTā jaatā hai

is qadar dard ko siine meñ dabāyā maiñ ne

haif bar haal dil-e-zār ki ā.īna huā

laakh parde meñ har ik raaz chhupāyā maiñ ne

zindagī guzrī hai be-kaif sī yārab phir bhī

garche hañs hañs ke har ik ġham ko miTāyā maiñ ne

kis ne ye kashmakash-e-shām-e-alam dekhī hai

jab koī dard uThā dil meñ dabāyā maiñ ne

kab tak is taur se 'nāshād' guzārūñgī hayāt

jab ḳhushī koī milī ashk bahāyā meñ ne

gosha-e-dil mein tera dard chhupaya main ne

chashm-e-tar ko bhi na ye raaz bataya main ne

kaun wo shab hai jo be-ashk bahae guzri

kaun wo gham hai jo dil par na uThaya main ne

ki zamane se kabhi koi shikayat na gila

apne riste hue zaKHmon ko chhupaya main ne

ab to dam zabt ki shiddat se ghaTa jata hai

is qadar dard ko sine mein dabaya main ne

haif bar haal dil-e-zar ki aaina hua

lakh parde mein har ek raaz chhupaya main ne

zindagi guzri hai be-kaif si yarab phir bhi

garche hans hans ke har ek gham ko miTaya main ne

kis ne ye kashmakash-e-sham-e-alam dekhi hai

jab koi dard uTha dil mein dabaya main ne

kab tak is taur se 'nashad' guzarungi hayat

jab KHushi koi mili ashk bahaya mein ne