aurat

bint-e-havvā huuñ maiñ

mujh ko taslīm hai TeḌhī paslī kī tā'mīr huuñ

par ye sach bhī suno dil kī dhaḌkan huuñ āñkhoñ kī tanvīr huuñ

maañ huuñ beTī huuñ biivī huuñ ham-shīr huuñ

sar-tā-pā maiñ mohabbat kī tasvīr huuñ

aadmī kī sakīnat ke sapne kī tā'bīr huuñ

zindagī raat hai aur ujālā huuñ maiñ

bint-e-havvā huuñ maiñ

mere ehsās ne aadmī kā hamesha tahaffuz kiyā

mere jazbāt ne aadmī ko aziyyat meñ kandhā diyā

merī chāhat ne dīvār-o-dar ko gharauñdā kiyā

husn-e-tartīb-e-duniyā-o-‘uqbā huuñ maiñ

bint-e-havvā huuñ maiñ

gaahe mujh ko qabīle kī pagḌī kī suulī chaḌhāyā gayā

gaahe bhā.iyoñ kī 'izzat pe nāmūs par dil dukhāyā gayā

mujh ko rauñdā gayā mujh ko kuchlā gayā āzmāyā gayā

maiñ ne sab dukh sahe mere aañsū bahe mujh pe har zulm Dhāyā gayā

mujh ko rauñdā gayā aur satāyā gayā

aise toḌā ki jaise khilaunā huuñ maiñ

bint-e-havvā huuñ maiñ

maiñ vo jis ne zamānoñ ko tahzīb dī

maiñ vo huuñ jis ne nasloñ kī tā'mīr kī

maiñ vahī jis kī aulād zāhid valī

mere qadmoñ meñ firdaus rakkhī ga.ī

harf-e-takrīm ḳhuld-e-mua’allā huuñ maiñ

bint-e-havvā huuñ maiñ

bint-e-hawwa hun main

mujh ko taslim hai TeDhi pasli ki ta'mir hun

par ye sach bhi suno dil ki dhaDkan hun aankhon ki tanwir hun

man hun beTi hun biwi hun ham-shir hun

sar-ta-pa main mohabbat ki taswir hun

aadmi ki sakinat ke sapne ki ta'bir hun

zindagi raat hai aur ujala hun main

bint-e-hawwa hun main

mere ehsas ne aadmi ka hamesha tahaffuz kiya

mere jazbaat ne aadmi ko aziyyat mein kandha diya

meri chahat ne diwar-o-dar ko gharaunda kiya

husn-e-tartib-e-duniya-o-‘uqba hun main

bint-e-hawwa hun main

gahe mujh ko qabile ki pagDi ki suli chaDhaya gaya

gahe bhaiyon ki 'izzat pe namus par dil dukhaya gaya

mujh ko raunda gaya mujh ko kuchla gaya aazmaya gaya

main ne sab dukh sahe mere aansu bahe mujh pe har zulm Dhaya gaya

mujh ko raunda gaya aur sataya gaya

aise toDa ki jaise khilauna hun main

bint-e-hawwa hun main

main wo jis ne zamanon ko tahzib di

main wo hun jis ne naslon ki ta'mir ki

main wahi jis ki aulad zahid wali

mere qadmon mein firdaus rakkhi gai

harf-e-takrim KHuld-e-mua’alla hun main

bint-e-hawwa hun main