bekas insan

fōtpath pe ik bekas insāñ

taklīf meñ taḌpā kartā hai

duniyā meñ koī ġham-ḳhvār nahīñ

majbūr hai aaheñ bhartā hai

barsāt ho yā jaaḌā garmī

har mausam ek guzartā hai

ehsās na kapḌoñ kā tan par

bas bhuuk ke maare martā hai

ambār pe kuuḌe ke jā kar

vo peT kā dozaḳh bhartā hai

phir bhī tujh pe jaañ detā hai

phir bhī terā dam bhartā hai

hai vaqf-e-sitam duniyā meñ jo

jaañ tujh pe nichhāvar kartā hai

kuchh bol mire mahbūb ḳhudā

kyoñ us pe jafā.eñ kartā hai

kyā tere ḳhazāne ḳhālī haiñ

yā tū bhī kisī se Dartā hai

jab terā koī qānūn nahīñ

karne de jo insāñ kartā hai

jis vaqt se dekhā hai yārab

us vaqt se ye dil Dartā hai

jo tujh pe mare jo tujh se Dare

tū zulm usī par kartā hai

aa arsh se tū bhī dekh zarā

kyūñkar tirā banda martā hai

'nāshād' kī āñkhoñ se aksar

tūfāñ ashkoñ kā bahtā hai

footpath pe ek bekas insan

taklif mein taDpa karta hai

duniya mein koi gham-KHwar nahin

majbur hai aahen bharta hai

barsat ho ya jaDa garmi

har mausam ek guzarta hai

ehsas na kapDon ka tan par

bas bhuk ke mare marta hai

ambar pe kuDe ke ja kar

wo peT ka dozaKH bharta hai

phir bhi tujh pe jaan deta hai

phir bhi tera dam bharta hai

hai waqf-e-sitam duniya mein jo

jaan tujh pe nichhawar karta hai

kuchh bol mere mahbub KHuda

kyon us pe jafaen karta hai

kya tere KHazane KHali hain

ya tu bhi kisi se Darta hai

jab tera koi qanun nahin

karne de jo insan karta hai

jis waqt se dekha hai yarab

us waqt se ye dil Darta hai

jo tujh pe mare jo tujh se Dare

tu zulm usi par karta hai

aa arsh se tu bhi dekh zara

kyunkar tera banda marta hai

'nashad' ki aankhon se aksar

tufan ashkon ka bahta hai