dam-e-ruKHsat

merī āñkhoñ meñ vo ruḳhsat kā samāñ hai ab bhī

isī andāz se dil girya-kunāñ hai ab bhī

haa.e vo 'āriz-e-gulgūñ pe machalte aañsū

ek sho'la sā mire dil pe ravāñ hai ab bhī

siskiyoñ se bhare lahje meñ ḳhatoñ kī tākīd

mere dil pe usī lahje kā nishāñ hai ab bhī

chaar din pahle se ik mohr-e-ḳhamoshī lab par

yaad mujh ko tirī ḳhāmosh fuġhāñ hai ab bhī

vo zarā baat pe muñh pher ke ro ro denā

mere ehsās pe ik bār-e-garāñ hai ab bhī

āḳhirī shab kise niiñd aa.ī thī pal bhar ke liye

mere kānoñ meñ vo āvāz-e-azāñ hai ab bhī

ek bosa jo diyā thā mire pairāhan par

pairahan par tire hoñToñ kā nishān hai ab bhī

mere ehsās ke partav ko samajhne vaalī

ek bastī mirī hastī meñ nihāñ hai ab bhī

dil tirī yaad se ġhāfil nahīñ pal bhar ke liye

terī sūrat mirī āñkhoñ meñ nihāñ hai ab bhī

kis tarah duur ho duurī koī tadbīr nahīñ

bamba.ī meñ vahī taklīf-e-makāñ hai ab bhī

ai mirī rūh-e-ġhazal husn-e-ġhazal jān-e-ġhazal

chain tujh bin tire 'kāmil' ko kahāñ hai ab bhī

meri aankhon mein wo ruKHsat ka saman hai ab bhi

isi andaz se dil girya-kunan hai ab bhi

hae wo 'ariz-e-gulgun pe machalte aansu

ek sho'la sa mere dil pe rawan hai ab bhi

siskiyon se bhare lahje mein KHaton ki takid

mere dil pe usi lahje ka nishan hai ab bhi

chaar din pahle se ek mohr-e-KHamoshi lab par

yaad mujh ko teri KHamosh fughan hai ab bhi

wo zara baat pe munh pher ke ro ro dena

mere ehsas pe ek bar-e-garan hai ab bhi

aaKHiri shab kise nind aai thi pal bhar ke liye

mere kanon mein wo aawaz-e-azan hai ab bhi

ek bosa jo diya tha mere pairahan par

pairahan par tere honTon ka nishan hai ab bhi

mere ehsas ke partaw ko samajhne wali

ek basti meri hasti mein nihan hai ab bhi

dil teri yaad se ghafil nahin pal bhar ke liye

teri surat meri aankhon mein nihan hai ab bhi

kis tarah dur ho duri koi tadbir nahin

bambai mein wahi taklif-e-makan hai ab bhi

ai meri ruh-e-ghazal husn-e-ghazal jaan-e-ghazal

chain tujh bin tere 'kaamil' ko kahan hai ab bhi