ek raqqasa ko dekh kar

dil ke bujhe charāġh jalātī chalī ga.ī

qadmoñ se so.e fitne jagātī chalī ga.ī

sho.ala thā vo lapaktā huā yā ki barq thī

rag rag meñ aag sī vo lagātī chalī ga.ī

yā jism ko vo ḳham ki kamāñ kām-dev kī

kis kis adā se tiir chalātī chalī ga.ī

phūloñ kī Dāliyoñ kī lachak bāzuoñ meñ thī

bal nāzukī ke bojh se khātī chalī ga.ī

nazm-e-hasīñ kaheñ ki use ham ġhazal kā sher

ahl-e-nazar ko vajd meñ laatī chalī ga.ī

ek jumbish-e-nazar se lachaktī kamar se vo

kyā kyā fasāne dil ke sunātī chalī ga.ī

ruḳh par birah kā rañg hai yā ki milan kī aas

duniyā-e-soz-o-sāz dikhātī chalī ga.ī

ḳhvāboñ kī bastiyoñ meñ uḌaa.e liye phirī

yādoñ kā ek shahr basātī chalī ga.ī

is daur-e-mai-kashī meñ kise hosh thā 'habīb'

kab aa.ī aur kab vo pilātī chalī ga.ī

dil ke bujhe charagh jalati chali gai

qadmon se soe fitne jagati chali gai

shoala tha wo lapakta hua ya ki barq thi

rag rag mein aag si wo lagati chali gai

ya jism ko wo KHam ki kaman kaam-dew ki

kis kis ada se tir chalati chali gai

phulon ki Daliyon ki lachak bazuon mein thi

bal nazuki ke bojh se khati chali gai

nazm-e-hasin kahen ki use hum ghazal ka sher

ahl-e-nazar ko wajd mein lati chali gai

ek jumbish-e-nazar se lachakti kamar se wo

kya kya fasane dil ke sunati chali gai

ruKH par birah ka rang hai ya ki milan ki aas

duniya-e-soz-o-saz dikhati chali gai

KHwabon ki bastiyon mein uDae liye phiri

yaadon ka ek shahr basati chali gai

is daur-e-mai-kashi mein kise hosh tha 'habib'

kab aai aur kab wo pilati chali gai