ghaalib

shā.ir-e-hindostāñ ai shā.ir-e-jādū-bayāñ

hind ke ḳhum-ḳhāna-e-irfāñ ke ai pīr-e-muġhāñ

tere naġhmoñ meñ nashāt-e-zindagī kī hai mahak

kaif se gul kā tabassum zikr-e-dil husn-e-butāñ

tere naġhmoñ meñ dil-e-insāñ kā hai soz-o-gudāz

jin se aksar hai ibārat zindagī kī dāstāñ

hai ḳhayāl-o-fikr kī duniyā tire har lafz meñ

paikar-e-ash.ār hai kitnā hasīñ kitnā javāñ

terī nazroñ ne TaTolā is tarah insāñ kā dil

mere dil kā raaz mujh par hī kiyā tū ne ayaañ

zindagī insāñ kī hai terī nazar meñ ik qafas

jis meñ hai hadd-e-nazar tak tīliyāñ hī tīliyāñ

faiz se tere hī hai urdu kā ye husn-e-jamāl

tere baa.is hī banī vo raunaq-e-bazm-e-jahāñ

tere naġhmoñ ko kabhī bhī maut aa saktī nahīñ

lā-zavāl un kī kashish un kī bahāreñ jāvedāñ

tere ilm-o-fan kī shohrat kā maiñ aalam kyā kahūñ

jhuk gayā qadmoñ pe tere bā-adab saarā jahāñ

shair-e-hindostan ai shair-e-jadu-bayan

hind ke KHum-KHana-e-irfan ke ai pir-e-mughan

tere naghmon mein nashat-e-zindagi ki hai mahak

kaif se gul ka tabassum zikr-e-dil husn-e-butan

tere naghmon mein dil-e-insan ka hai soz-o-gudaz

jin se aksar hai ibarat zindagi ki dastan

hai KHayal-o-fikr ki duniya tere har lafz mein

paikar-e-ashaar hai kitna hasin kitna jawan

teri nazron ne TaTola is tarah insan ka dil

mere dil ka raaz mujh par hi kiya tu ne ayan

zindagi insan ki hai teri nazar mein ek qafas

jis mein hai hadd-e-nazar tak tiliyan hi tiliyan

faiz se tere hi hai urdu ka ye husn-e-jamal

tere bais hi bani wo raunaq-e-bazm-e-jahan

tere naghmon ko kabhi bhi maut aa sakti nahin

la-zawal un ki kashish un ki bahaaren jawedan

tere ilm-o-fan ki shohrat ka main aalam kya kahun

jhuk gaya qadmon pe tere ba-adab sara jahan