gham

jahāñ meñ ġham bhī hai raushan-tarīñ sitāroñ meñ

dikhātā raah hai zulmat ke ḳhārzāroñ meñ

nahīñ surūd meñ chañg-o-rabāb meñ bhī nahīñ

vo ek lai ki hai TuuTe diloñ ke tāroñ meñ

ḳhizāñ kī shaukat-o-azmat hai un pe sab zāhir

jo DhūñDte use phirte rahe bahāroñ meñ

ḳhushī se husn nikhartā hai zāhirī lekin

jamīl rūhoñ ko pāoge ġham ke māroñ meñ

baġhair dard nahīñ hai kabhī zuhūr-e-hayāt

jigar kā ḳhuun ubhartā hai shāhkāroñ meñ

makīñ haram ke musībat ko un kī kyā jāneñ

jo ḳhaak chhānte haiñ ajnabī dayāroñ meñ

pasand aayā jo TuuTe diloñ kā izz-o-niyāz

to bas gayā hai ḳhudā bhī gunahgāroñ meñ

kabhī to dekhte tum aa ke ġham nasīboñ ko

hasīn daaġh hai siine ke lāla-zāroñ meñ

jahan mein gham bhi hai raushan-tarin sitaron mein

dikhata rah hai zulmat ke KHarzaron mein

nahin surud mein chang-o-rabab mein bhi nahin

wo ek lai ki hai TuTe dilon ke taron mein

KHizan ki shaukat-o-azmat hai un pe sab zahir

jo DhunDte use phirte rahe bahaaron mein

KHushi se husn nikharta hai zahiri lekin

jamil ruhon ko paoge gham ke maron mein

baghair dard nahin hai kabhi zuhur-e-hayat

jigar ka KHun ubharta hai shahkaron mein

makin haram ke musibat ko un ki kya jaanen

jo KHak chhante hain ajnabi dayaron mein

pasand aaya jo TuTe dilon ka izz-o-niyaz

to bas gaya hai KHuda bhi gunahgaron mein

kabhi to dekhte tum aa ke gham nasibon ko

hasin dagh hai sine ke lala-zaron mein