jaldi miyan

hai naam to ḳhurshed ḳhaañ

kahte haiñ sab jaldī miyāñ

har kaam meñ gaḌbaḌ kareñ

kamroñ meñ vo khaḌbaḌ kareñ

haiñ der se vo jāgte

schōl jaa.eñ bhāgte

ustād jab pūchheñ savāl

ho jaa.eñ fauran vo niDhāl

bātoñ kā un ko shauq hai

kushtī kā bhī kuchh zauq hai

āshiq haiñ vo fōtbāl ke

dushman haiñ roTī daal ke

halva magar marġhūb hai

aur chaa.e bhī mahbūb hai

ik din vo jaldī meñ chale

dekhā nahīñ thā sāmne

kele kā chhalkā thā paḌā

us par jo paañv rakh diyā

phisle chunāñche gir paḌe

aur dard se rone lage

maañ ne uThāyā pyaar se

bahlāyā phir chumkār ke

jaldī miyāñ jab chup hue

ammī lagīñ ye pūchhne

chhilkā ye pheñkā kis ne yaañ

sūjhīñ kise nādāniyāñ

jaldī miyāñ kā sar jhukā

taalā thā muñh par ik lagā

jaatā na thā un se kahā

chhilkā to pheñkā maiñ ne thā

hai nam to KHurshed KHan

kahte hain sab jaldi miyan

har kaam mein gaDbaD karen

kamron mein wo khaDbaD karen

hain der se wo jagte

school jaen bhagte

ustad jab puchhen sawal

ho jaen fauran wo niDhaal

baaton ka un ko shauq hai

kushti ka bhi kuchh zauq hai

aashiq hain wo footbaal ke

dushman hain roTi dal ke

halwa magar marghub hai

aur chae bhi mahbub hai

ek din wo jaldi mein chale

dekha nahin tha samne

kele ka chhalka tha paDa

us par jo panw rakh diya

phisle chunanche gir paDe

aur dard se rone lage

man ne uThaya pyar se

bahlaya phir chumkar ke

jaldi miyan jab chup hue

ammi lagin ye puchhne

chhilka ye phenka kis ne yan

sujhin kise nadaniyan

jaldi miyan ka sar jhuka

tala tha munh par ek laga

jata na tha un se kaha

chhilka to phenka main ne tha