کالی داس

جہان علم کو تسلیم ہے وقار ترا

ادب کے پھولوں سے دامن ہے لالہ زار ترا

چمن میں یوں تو بہار آتی جاتی رہتی ہے

مگر سخن کا ہے گلشن سدا بہار ترا

جمال حسن کی دنیا میں کھو گیا ہے وہ

پڑھا کلام ہے جس نے بھی ایک بار ترا

نظر فروز وہ معنی وہ دل کشا الفاظ

کہ ہے بیاض کا ہر صفحہ زرنگار ترا

تری نظیر نہیں رفعت تخیل میں

سخن ہے عرش معلیٰ سے ہمکنار ترا

طیور و وحشی و انسان و فطرت رنگیں

ترے کلام میں یکساں ہے سب سے پیار ترا

کھلا ورق تھا دل انسان کا ترے آگے

ہے ترجمانیٔ جذبات شاہکار ترا

نشاط وصل ہے حاصل ترے فسانوں میں

اسی ترانے سے ہے ساز نغمہ بار ترا

وہ ترجمانیٔ تہذیب ہند کی تو نے

کہ یادگار زمانہ ہے روزگار تیرا

دیا ہے شیکسپئیر کو مقام مغرب نے

ہے گوشہ گوشۂ عالم میں حق گزار ترا

شراب حسن لٹائی ہے تو نے خم کے خم

رہے گا کیف سے سرشار بادہ خوار ترا

ہے تیرے نغموں کا شیدا حبیبؔ مدت سے

اسی شراب میں ہے مست بادہ خوار ترا