nauha

zindagī bahtī rahī āb-e-ravāñ kī mānind

kabhī halkī sī kabhī ḳhvāb-e-girāñ kī mānind

vaqt kī lahroñ pe ma.asūm sā chehra ubhrā

aur phir ho gayā gum vahm-o-gumāñ kī mānind

dilrubā chehre pe kyoñ chhāyā qazā kā saayā

kyoñ bahāroñ kā huā rañg ḳhizāñ ke mānind

ho ga.ī kyoñ vo chahaktī huī bulbul ḳhāmosh

kyoñ girā phuul jo gulshan meñ thā jaañ kī mānind

riñd jhuum uThte the mastān adā par jis kī

ab yahāñ kaun hai us pīr-e-muġhāñ kī mānind

ḳhaak uḌtī hai jahāñ qahqahe hote the buland

naġhma-e-bazm hai ab āh-o-fuġhāñ kī mānind

garmī-e-dil thī vahī us kī vahī zauq-e-talab

Dhalte sāyoñ meñ vo thā mard-e-javāñ kī mānind

umr bhar yād-e-chatar ham ko rulā.egī 'habīb'

ġham satā.egī sadā dard-e-nihāñ kī mānind

zindagi bahti rahi aab-e-rawan ki manind

kabhi halki si kabhi KHwab-e-giran ki manind

waqt ki lahron pe masum sa chehra ubhra

aur phir ho gaya gum wahm-o-guman ki manind

dilruba chehre pe kyon chhaya qaza ka saya

kyon bahaaron ka hua rang KHizan ke manind

ho gai kyon wo chahakti hui bulbul KHamosh

kyon gira phul jo gulshan mein tha jaan ki manind

rind jhum uThte the mastan ada par jis ki

ab yahan kaun hai us pir-e-mughan ki manind

KHak uDti hai jahan qahqahe hote the buland

naghma-e-bazm hai ab aah-o-fughan ki manind

garmi-e-dil thi wahi us ki wahi zauq-e-talab

Dhalte sayon mein wo tha mard-e-jawan ki manind

umr bhar yaad-e-chatar hum ko rulaegi 'habib'

gham sataegi sada dard-e-nihan ki manind