naya ek jahan

chalo nayā ik jahāñ basā leñ

jahāñ har insān ho barābar

na koī ūñchā na koī nīchā

na koī gorā na koī kaalā

kisī kī dāḌhī kisī kī choTī

se farq hotā na ho jahāñ par

jahāñ ki maz.hab agar ho koī

to vo ho insāniyat kā maz.hab

kare hukūmat to bas mohabbat

na koī ranjish na koī nafrat

ḳhulūs ko marne se bachā leñ

chalo nayā ik jahāñ basā leñ

maiñ baat kartā huuñ is jahāñ kī

jo is jahāñ meñ nahīñ hai shāyad

vo jis ke baare kahāniyoñ meñ

paḌhā thā shāyad sunā thā shāyad

vo jis meñ har shaḳhs ek sā ho

burā bhī ho gar to nek sā ho

jahāñ ki har koī dūsre ke

lahū kī qīmat samajh rahā ho

jahāñ kisī kā na qatl hotā

ho zaat maz.hab kā naam le kar

vahīñ kahīñ apnī jā banā leñ

chalo nayā ik jahāñ basā leñ

maiñ sochtā huuñ kahāñ milegā

jahāñ vo jis meñ ho sirf insāñ

na koī vahshī na ho darinda

jahāñ ki aurat kī aabrū ko

na noch kar koī khā rahā ho

ki koī vahshat kā raqs kar ke

na mard ḳhud ko batā rahā ho

jahāñ ki mahfūz ḳhud ko samjhe

har ek havvā har ik yashoda

har ek mariyam har ek siitā

ye farz hai ham use nibhā leñ

chalo nayā ik jahāñ basā leñ

maiñ jāntā huuñ ki aisī duniyā

hai DhūñD paanā bahut hī mushkil

yā yuuñ bhī kah leñ nahīñ hai mumkin

vo is liye kyoñ ki aadmī ab

ġhalīz kīḌoñ se bhī burā hai

jo apnī had se guzar chukā hai

aur ek duuje ko khā rahā hai

bashar kā matlab bhulā rahā hai

ki ḳhud ko haivāñ banā rahā hai

na jaane kis samt jā rahā hai

ham is jahannam se jaañ chhuḌā leñ

chalo nayā ik jahāñ basā leñ

chalo naya ek jahan basa len

jahan har insan ho barabar

na koi uncha na koi nicha

na koi gora na koi kala

kisi ki daDhi kisi ki choTi

se farq hota na ho jahan par

jahan ki mazhab agar ho koi

to wo ho insaniyat ka mazhab

kare hukumat to bas mohabbat

na koi ranjish na koi nafrat

KHulus ko marne se bacha len

chalo naya ek jahan basa len

main baat karta hun is jahan ki

jo is jahan mein nahin hai shayad

wo jis ke bare kahaniyon mein

paDha tha shayad suna tha shayad

wo jis mein har shaKHs ek sa ho

bura bhi ho gar to nek sa ho

jahan ki har koi dusre ke

lahu ki qimat samajh raha ho

jahan kisi ka na qatl hota

ho zat mazhab ka nam le kar

wahin kahin apni ja bana len

chalo naya ek jahan basa len

main sochta hun kahan milega

jahan wo jis mein ho sirf insan

na koi wahshi na ho darinda

jahan ki aurat ki aabru ko

na noch kar koi kha raha ho

ki koi wahshat ka raqs kar ke

na mard KHud ko bata raha ho

jahan ki mahfuz KHud ko samjhe

har ek hawwa har ek yashoda

har ek mariyam har ek sita

ye farz hai hum use nibha len

chalo naya ek jahan basa len

main jaanta hun ki aisi duniya

hai DhunD pana bahut hi mushkil

ya yun bhi kah len nahin hai mumkin

wo is liye kyon ki aadmi ab

ghaliz kiDon se bhi bura hai

jo apni had se guzar chuka hai

aur ek duje ko kha raha hai

bashar ka matlab bhula raha hai

ki KHud ko haiwan bana raha hai

na jaane kis samt ja raha hai

hum is jahannam se jaan chhuDa len

chalo naya ek jahan basa len