nazm

ḳhatra hai zardāroñ ko

girtī huī dīvāroñ ko

sadiyoñ ke bīmāroñ ko

ḳhatre meñ islām nahīñ

saarī zamīñ ko ghere hue haiñ

āḳhir chand gharāne kyoñ

naam nabī kā lene vaale

ulfat se begāne kyoñ

ḳhatra hai ḳhūñ-ḳhvāroñ ko

rang-birangī caroñ ko

america ke pyāroñ ko

ḳhatre meñ islām nahīñ

aaj hamāre nā'roñ se

larzā hai bapā aivānoñ meñ

bik na sakeñge hasrat-o-armāñ

ūñchī sajī dukānoñ meñ

ḳhatra hai baT-māroñ ko

maġhrib ke bāzāroñ ko

choroñ ko makkāroñ ko

ḳhatre meñ islām nahīñ

amn kā parcham le kar uTTho

har insān se pyaar karo

apnā to manshūr hai 'jālib'

saare jahāñ se pyaar karo

ḳhatra hai darbāroñ ko

shāhoñ ke ġham-ḳhvāroñ ko

navvāboñ ġhaddāroñ ko

ḳhatre meñ islām nahīñ

KHatra hai zardaron ko

girti hui diwaron ko

sadiyon ke bimaron ko

KHatre mein islam nahin

sari zamin ko ghere hue hain

aaKHir chand gharane kyon

nam nabi ka lene wale

ulfat se begane kyon

KHatra hai KHun-KHwaron ko

rang-birangi caron ko

america ke pyaron ko

KHatre mein islam nahin

aaj hamare na'ron se

larza hai bapa aiwanon mein

bik na sakenge hasrat-o-arman

unchi saji dukanon mein

KHatra hai baT-maron ko

maghrib ke bazaron ko

choron ko makkaron ko

KHatre mein islam nahin

amn ka parcham le kar uTTho

har insan se pyar karo

apna to manshur hai 'jalib'

sare jahan se pyar karo

KHatra hai darbaron ko

shahon ke gham-KHwaron ko

nawwabon ghaddaron ko

KHatre mein islam nahin