paris

aaj is shahr-e-mo.attar ne pukārā hai mujhe

aaj phir nauha-kunāñ haiñ yahāñ galiyoñ vaale

ye vo galiyāñ haiñ jo ḳhushbū kī qabā.eñ thiiñ kabhī

ye vo chehre haiñ jo mash.hūr the kaliyoñ vaale

inhī galiyoñ se thī vābasta na.ī fikr kī rah

unhīñ galiyoñ meñ ma.ānī ke sabaq milte the

vahshat-e-daur-e-siyāsat pe huā kartī thī bahas

aur qalam hañste hue zāviye ban jaate the

mastī-e-tīra-shabī par hai gunah kā ḳhāka

shaiḳh-o-mullā-o-kalīsā ho ki shah kā ḳhāka

sūrat-e-maz.hab-o-īmān-o-mavaddat pe ḳhaak

aur ik pal meñ kisī dīn-e-panah kā ḳhāka

jo adū haiñ vo hamāre hī adū kab haiñ faqat

ham hadaf kab haiñ ki un kā hadaf āsānī hai

un ko ma.alūm nahīñ ham haiñ koī shaukat-e-zau

ilm kā qatl faqat maz.habī nādānī hai

is se pahle bhī to aisī hī qayāmat TuuTī

is se pahle bhī sajā ilm kā maqtal logo

is se pahle bhī to vahshat kā chalan aam huā

is se pahle bhī to barsā yahī bādal logo

nok-e-ḳhanjar bhī vahī shahr kā maqtal bhī vahī

maktab-o-tifl rah-e-ilm kī gardan huī daaġh

shab huvaidā huī tārīkiyāñ jab jab bhī baḌhīñ

ḳhilqat-e-shahr-e-farozāñ ne jalā.e haiñ charāġh

irtiqā shar yā sharī.at se nahīñ ruk saktā

ye qasīda bhī na.e ahd se paivasta hai

ya.anī sūraj jo bujhegā to jal uTTheñge diye

kārvāñ sub.h kā us lau hī se vābasta hai

phir baneñge na.e ḳhāke ki yahī sūrat-e-shab

vahshat-e-daur-e-siyāsat kī gavāhī hogī

shahr bhī shahr gulistāñ kī tarah jāgegā

lafz ke haath se dahshat kī tabāhī hogī

aaj is shahr-e-moattar ne pukara hai mujhe

aaj phir nauha-kunan hain yahan galiyon wale

ye wo galiyan hain jo KHushbu ki qabaen thin kabhi

ye wo chehre hain jo mashhur the kaliyon wale

inhi galiyon se thi wabasta nai fikr ki rah

unhin galiyon mein maani ke sabaq milte the

wahshat-e-daur-e-siyasat pe hua karti thi bahas

aur qalam hanste hue zawiye ban jate the

masti-e-tira-shabi par hai gunah ka KHaka

shaiKH-o-mulla-o-kalisa ho ki shah ka KHaka

surat-e-mazhab-o-iman-o-mawaddat pe KHak

aur ek pal mein kisi din-e-panah ka KHaka

jo adu hain wo hamare hi adu kab hain faqat

hum hadaf kab hain ki un ka hadaf aasani hai

un ko malum nahin hum hain koi shaukat-e-zau

ilm ka qatl faqat mazhabi nadani hai

is se pahle bhi to aisi hi qayamat TuTi

is se pahle bhi saja ilm ka maqtal logo

is se pahle bhi to wahshat ka chalan aam hua

is se pahle bhi to barsa yahi baadal logo

nok-e-KHanjar bhi wahi shahr ka maqtal bhi wahi

maktab-o-tifl rah-e-ilm ki gardan hui dagh

shab huwaida hui tarikiyan jab jab bhi baDhin

KHilqat-e-shahr-e-farozan ne jalae hain charagh

irtiqa shar ya shariat se nahin ruk sakta

ye qasida bhi nae ahd se paiwasta hai

yani suraj jo bujhega to jal uTThenge diye

karwan subh ka us lau hi se wabasta hai

phir banenge nae KHake ki yahi surat-e-shab

wahshat-e-daur-e-siyasat ki gawahi hogi

shahr bhi shahr gulistan ki tarah jagega

lafz ke hath se dahshat ki tabahi hogi