pesh-goi

bekārī hogī faaqe hoñge

jo insāñ saḌkoñ par haiñ

saḌkoñ par hī raheñge

jo dukh sahte haiñ dukh hī saheñge

rishvat-ḳhorī aur ġhaban kī daftar daftar dhuum rahegī

kamzoroñ par shah-zoroñ kā zulm rahegā

haq-dāroñ ko mil na sakegā

mujrim sab āzād raheñge

munsif bhī insāf se be-bahra hogā

sach par pahra hogā

amn kī jin se ummīdeñ haiñ zulm ke naġhme gā.eñge

jantā kā haq netā khā jā.eñge

sirf zabānī hamdardī kā shor machā.eñge

is ke 'alāva sāl-e-nau ke dāman meñ

kuchh bhī na hogā

sāl-e-nau kī aamad se dil Dartā hai

dil āḳhir dil hai

phir bhī ummīdeñ kartā hai

kaash koī sāl-e-nau mil kar

mujh ko batā.e

maiñ jhūTā huuñ

bekari hogi faqe honge

jo insan saDkon par hain

saDkon par hi rahenge

jo dukh sahte hain dukh hi sahenge

rishwat-KHori aur ghaban ki daftar daftar dhum rahegi

kamzoron par shah-zoron ka zulm rahega

haq-daron ko mil na sakega

mujrim sab aazad rahenge

munsif bhi insaf se be-bahra hoga

sach par pahra hoga

amn ki jin se ummiden hain zulm ke naghme gaenge

janta ka haq neta kha jaenge

sirf zabani hamdardi ka shor machaenge

is ke 'alawa sal-e-nau ke daman mein

kuchh bhi na hoga

sal-e-nau ki aamad se dil Darta hai

dil aaKHir dil hai

phir bhi ummiden karta hai

kash koi sal-e-nau mil kar

mujh ko batae

main jhuTa hun